لاہور:پاکستان سپر لیگ سیزن فائیو میں شریک غیر ملکی کھلاڑیوں نے چہروں پر ماسک پہننا شروع کردئیے،لاہور قلندرز کے غیرملکی کرکٹرز کی احتیاطی تدابیر کے طور پر ماسک پہنے تصاویرسوشل میڈیا پر وائرل ہوگئی ہے۔
تفصیلات کے مطابق پی ایس ایل کے میچز پہلی مرتبہ پاکستان کے چار شہروں میں کر نے کا فیصلہ کیاگیا ،ملتان نے تین میچوں کی میزبانی کا اپنا کوٹہ مکمل کر لیا ہے، اب کھلاڑی لاہور، کراچی اور اسلام آباد کے درمیان سفر جاری رکھیں گے۔
پی ایس ایل کے میچز کے دوران ہی کراچی اور اسلام آباد میں کرونا وائرس کے مریض سامنے آئے ہیں، ایسے میں جہاں ہر کوئی احتیاطی تدابیر اختیار کر رہا ہے وہاں پی ایس ایل کے غیر ملکی کھلاڑی بھی شامل ہیں۔
لاہور قلندرز کی ٹیم نے پنڈی اسٹیڈیم میں پشاور زلمی کے خلاف میچ کے بعد اسلام آباد سے لاہور کا سفر کیا جہاں اس نے اپنا اگلا میچ 3 مارچ کو کھیلنا ہے، لاہور قلندرز کے غیر ملکی کھلاڑیوں نے سفر چہروں پر ماسک کے ساتھ کیا۔
لاہور قلندرز کے آل راؤنڈر ڈیوڈ ویزے نے ماسک کے ساتھ کھلاڑیوں کی تصویر پوسٹ کی جس میں کسی بھی وائرس کے خلاف لڑنے کے لیے کھلاڑیوں نے ماسک پہنے ہوئے ہیں۔
