پنجاب میں شرمپ فارمنگ کے فروغ کے لیے بڑے اور تاریخی اقدامات

لاہور: وزیراعلیٰ پنجاب مریم نواز شریف کی قیادت میں پنجاب میں شرمپ فارمنگ کے فروغ کے لیے بڑے اور تاریخی اقدامات کیے جا رہے ہیں۔ ان اقدامات کے تحت سرگودھا اور علی پور میں 5 ہزار 600 ایکڑ رقبے پر شرمپ سٹیٹس قائم کی جا رہی ہیں، جس سے نہ صرف آبی حیات کی صنعت کو فروغ ملے گا بلکہ مقامی معیشت میں بھی نمایاں بہتری آئے گی۔

مریم نواز شریف نے اس منصوبے کو زرعی اور معاشی ترقی کا سنگِ میل قرار دیا ہے۔ ان کا کہنا ہے کہ "یہ منصوبہ پنجاب میں بلیو اکانومی کا سب سے بڑا اور اہم منصوبہ ہے، جو نہ صرف صوبے کی برآمدات میں اضافہ کرے گا بلکہ ہزاروں نوجوانوں کے لیے روزگار کے نئے مواقع بھی پیدا کرے گا۔"

سرگودھا میں شرمپ فارمنگ کے منصوبے کے 15ویں یومیہ ترقیاتی رپورٹ کے مطابق، 20 ایکڑ اراضی پر 9 تالاب تیار کر لیے گئے ہیں، جبکہ 5 ہزار 320 میٹر ڈرینج کا کام بھی مکمل ہو چکا ہے۔ اگلے مرحلے میں مزید 10 ایکڑ اراضی پر سروے مکمل کیا جا چکا ہے۔

لاہور میں ساڑھے چار ارب روپے کی لاگت سے قائم کی جانے والی کوالٹی کنٹرول لیبارٹری کا 99 فیصد کام مکمل ہو چکا ہے، جبکہ مظفرگڑھ میں تحقیق اور شرمپ فارمنگ کے لیے سازگار ماحول کی فراہمی کی لیبارٹری کا 98 فیصد کام بھی مکمل کر لیا گیا ہے۔ ان اقدامات کے ذریعے اس صنعت کی معیار کو بہتر بنانے اور عالمی مارکیٹ میں اس کی مقبولیت بڑھانے کی کوشش کی جا رہی ہے۔

پاکستانی ماہرین کے سعودی عرب اور میکسیکو میں تربیتی دوروں نے منصوبے کے لیے نئی امیدیں جگائی ہیں۔ علاوہ ازیں، 100 انٹرنز کے تحریری امتحانات بھی مکمل ہو چکے ہیں تاکہ اس شعبے میں جدید ترین مہارت حاصل کی جا سکے۔

شرمپ فارمنگ کے منصوبے کے تحت 32 ٹیوب ویلوں اور 8 ٹرانسفارمرز کی تنصیب کا کام مکمل کیا جا چکا ہے۔ اس کے علاوہ، 64 تالابوں میں شرمپ کا بیج ڈالا گیا ہے، اور سرگودھا کے چک نمبر 58 میں 124 ایکڑ اراضی پر شرمپ سٹیٹ اور ویلیو چین قائم کی جائے گی۔

اس منصوبے سے متعلق وزیراعلیٰ مریم نواز کا کہنا تھا کہ "یہ قدم نہ صرف آبی حیات کے تحفظ کے لیے ضروری ہے بلکہ اس سے آبی زراعت کی صنعت کو بھی ایک نیا رخ ملے گا، جو دنیا بھر میں بڑھتی ہوئی طلب کے پیش نظر ایک اہم موقع ہے۔