تہران: ایران نے اپنے مرحوم سپریم لیڈر آیت اللہ علی خامنہ ای کی نماز جنازہ سے قبل امریکا اور اسرائیل کو خبردار کرتے ہوئے کہا ہے کہ کسی بھی ممکنہ جارحیت یا حملے سے باز رہا جائے، ورنہ سنگین نتائج کا سامنا کرنا پڑے گا۔
ایرانی سرکاری میڈیا کے مطابق کمانڈر خاتم الانبیاء مرکزی ہیڈکوارٹرز علی عبداللہی نے اپنے بیان میں کہا کہ ایران کے مخالفین، خصوصاً امریکا اور اسرائیل کسی بھی غلط اندازے سے گریز کریں کیونکہ اسلامی جمہوریہ ایران اپنی سلامتی کے خلاف کسی بھی خطرے کا سخت اور فوری جواب دینے کی صلاحیت رکھتا ہے۔
یہ انتباہ ایسے وقت میں سامنے آیا ہے جب ملک بھر میں آیت اللہ علی خامنہ ای کی سرکاری نماز جنازہ کے انتظامات جاری ہیں اور خطے میں پہلے سے موجود کشیدہ صورتحال مزید حساس ہو گئی ہے۔
دوسری جانب پاسدارانِ انقلاب اسلامی (آئی آر جی سی) کے اعلیٰ کمانڈر نے نماز جنازہ کے انتظامات سے متعلق غیر یقینی صورتحال کا بھی اظہار کیا ہے۔ صوبہ قم میں تعینات کمانڈر فتح اللہ جمیری کے مطابق اگرچہ جلوس کے لیے مکمل منصوبہ بندی کر لی گئی ہے، تاہم سیکیورٹی خدشات اور ممکنہ بڑے عوامی اجتماع کے باعث حتمی صورتحال پر یقین سے کچھ نہیں کہا جا سکتا۔
انہوں نے بتایا کہ نماز جنازہ کا مجوزہ جلوس مسجد جمکران سے شروع ہو کر حضرت فاطمہؑ کے روضے تک پہنچنے کا منصوبہ ہے، تاہم شرکاء کی بڑی تعداد اور ٹریفک و انتظامی مسائل کے باعث زمینی صورتحال میں تبدیلی کا امکان موجود ہے۔
ایرانی حکام کے مطابق سیکیورٹی ادارے صورتحال پر کڑی نظر رکھے ہوئے ہیں اور بڑے عوامی اجتماع کو منظم کرنے کے لیے خصوصی انتظامات کیے جا رہے ہیں، تاہم حتمی فیصلے حالات کے مطابق کیے جائیں گے۔
یہ پیش رفت ایک ایسے وقت میں سامنے آئی ہے جب ایران اندرونی طور پر ایک بڑے ریاستی اور مذہبی موقع کی تیاریوں میں مصروف ہے جبکہ خطے میں سفارتی و سیکیورٹی کشیدگی بھی برقرار ہے۔