لاہور : دورہ نیوزی لینڈ کے لیے قومی کرکٹ ٹیم میں 5 سے 6 کھلاڑیوں کی تبدیلی متوقع ہے۔ ذرائع کے مطابق، بابر اعظم سمیت سینئر کھلاڑیوں کو آرام دینے کا فیصلہ کیا گیا ہے۔ اس سلسلے میں چیئرمین پی سی بی محسن نقوی نے نیشنل کرکٹ اکیڈمی میں ڈومیسٹک کرکٹ کے پرفارمرز سے ملاقات کی، جس میں کھلاڑیوں کے مسائل سنے گئے۔
ملاقات میں حیدر علی، معاذ صداقت، محمد سلیمان، خواجہ نافع، سعد مسعود، آفاق آفریدی، مبصر خان، فیصل اکرم، قاسم اکرم، عرفات منہاس، مرزا طاہر بیگ، احمد دانیال، علی رضا، محمد ابتسام اور دیگر کھلاڑی شامل تھے۔ عاکف جاوید کو بھی اس ملاقات میں شرکت کے لیے بلایا گیا تھا، لیکن وہ کچھ مصروفیات کے باعث لاہور نہیں آ سکے۔ ذرائع کے مطابق، ان 16 کھلاڑیوں میں سے 5 سے 6 نوجوان کھلاڑیوں کا انتخاب دورہ نیوزی لینڈ کے لیے کیا جائے گا۔ سکواڈ کا انتخاب موجودہ سلیکشن کمیٹی کرے گی، اور اس کا اعلان تین سے چار روز میں متوقع ہے۔