اسلام آباد : پاکستان کے وزیر اعظم شہباز شریف نے ماہ رمضان کے دوران سحر و افطار کے اوقات میں گیس کی فراہمی میں مشکلات کا نوٹس لیتے ہوئے فوری اقدامات کی ہدایت کی ہے۔ وزیر اعظم نے اس مسئلے کے حل کے لیے سوئی گیس کمپنیوں کے اعلیٰ حکام کے ساتھ رات گئے ہنگامی اجلاس کیا، جس میں گیس کے پریشر اور فراہمی کے مسائل پر تفصیل سے گفتگو کی گئی۔
وزیر اعظم کی ہدایات پر سوئی سدرن گیس کمپنی نے گیس کے پریشر میں 10 فیصد اضافہ کرنے کا فیصلہ کیا ہے۔ اس کے علاوہ، سحر و افطار کے اوقات کے دوران گیس کی فراہمی میں بہتری لانے کے لیے گیس ڈسٹریبیوشن کے آخری حصوں میں گیس کی فراہمی 30 سے 45 منٹ پہلے شروع کی جائے گی تاکہ ان علاقوں میں پریشر بہتر ہو سکے۔
سوئی سدرن گیس کمپنی نے اس کے علاوہ گیس کی فراہمی کے نظام کی نگرانی کے لیے کنٹرول رومز قائم کرنے کا بھی اعلان کیا ہے، جو روزانہ کی بنیاد پر گیس کی صورتحال کا جائزہ لیں گے۔ کمپنی کے ترجمان نے کہا کہ گیس کے کم پریشر کی شکایات کو فوراً حل کیا جائے گا اور اس سلسلے میں روزانہ رپورٹ بھی تیار کی جائے گی۔