وزیر داخلہ محسن نقوی کا نادرا سنٹر کا اچانک دورہ: شدید حبس اور بدانتظامی پر افسران کی سخت سرزنش

لاہور: وفاقی وزیر داخلہ محسن نقوی نے لاہور میں شملہ پہاڑی پر واقع نادرا سنٹر کا بغیر کسی پیشگی اطلاع کے دورہ کیا۔ دورے کے دوران شہریوں کی لمبی قطاریں، شدید رش اور ایئر کنڈیشنرز (AC) بند ہونے پر وزیر داخلہ نے سخت برہمی کا اظہار کرتے ہوئے انتظامیہ کی کلاس لے لی۔
وزیر داخلہ محسن نقوی جب نادرا سنٹر پہنچے تو وہاں کاؤنٹرز پر لوگوں کا بے پناہ رش موجود تھا۔ انہوں نے پروٹوکول کے بغیر مختلف کاؤنٹرز کا معائنہ کیا اور درج ذیل صورتحال پر ایکشن لیا۔ سنٹر میں اے سی بند ہونے کی وجہ سے حبس اور گرمی دیکھ کر محسن نقوی نے انتظامیہ پر برہمی کا اظہار کیا اور اسے فوری فعال کرنے کا حکم دیا۔
وزیر داخلہ خود قطاروں میں کھڑے شہریوں کے پاس گئے، ان سے ہاتھ ملایا اور شناختی کارڈ بنوانے میں پیش آنے والی تاخیر اور دیگر مشکلات کے بارے میں دریافت کیا۔
محسن نقوی نے نادرا حکام کو موقع پر ہی ہدایات جاری کرتے ہوئے کہا کہ  عوام کو گھنٹوں انتظار کروانے کے بجائے ٹوکن سسٹم اور کاؤنٹرز کی کارکردگی کو بہتر بنایا جائے۔شہریوں کے لیے پینے کے ٹھنڈے پانی اور بیٹھنے کے مناسب انتظامات کو یقینی بنایا جائے۔ وفاقی وزیر نے واضح کیا کہ عوام نادرا دفاتر میں سہولت کے لیے آتے ہیں، ان کی تذلیل کسی صورت برداشت نہیں کی جائے گی۔
وزیر داخلہ نے وارننگ دی کہ وہ مستقبل میں بھی نادرا مراکز کے سرپرائز دورے جاری رکھیں گے۔ انہوں نے ہدایت کی کہ نادرا سنٹر شملہ پہاڑی پر رش کو کم کرنے کے لیے فوری طور پر اضافی عملہ تعینات کیا جائے تاکہ شہریوں کو ذلیل و خوار نہ ہونا پڑے۔