اسلام آباد: عالمی مالیاتی فنڈ (آئی ایم ایف) کا وفد پاکستان پہنچ چکا ہے اور اب وہ گورننس سے متعلق تکنیکی معاونت پر پاکستانی حکام سے بات چیت کرے گا۔
وزارت خزانہ کے ذرائع کے مطابق آئی ایم ایف کا وفد آئندہ مالی سال کے بجٹ کے تخمینہ جات کا جائزہ لے گا، جس کے بعد جون کے پہلے عشرے میں بجٹ کے اہداف کو حتمی شکل دے کر وفاقی بجٹ پیش کیا جائے گا۔
آئی ایم ایف وفد پیر سے وزارت خزانہ کے حکام سے ملاقات کرے گا اور اصلاحات کے لیے تکنیکی امداد فراہم کرے گا۔ اس دورے کا مقصد پاکستان کی اصلاحات کی استعداد بڑھانے کے لیے ضروری اقدامات پر بات کرنا ہے۔
ذرائع نے بتایا کہ آئی ایم ایف وفد اگلے مالی سال کے لیے ٹیکس ریونیو میں اضافے اور اخراجات پر کنٹرول کے حوالے سے پاکستانی حکام کے ساتھ مذاکرات کرے گا، اور اس کے بعد بجٹ کو حتمی شکل دینے کی تیاریاں کی جائیں گی۔