کیلیفورنیا : گوگل نے اپنے اینڈرائیڈ آپریٹنگ سسٹم میں ایک نیا اور اہم اپ ڈیٹ جاری کیا ہے جس کے ذریعے کمپنیوں کے مالکان اپنے ملازمین کے RCS (رچ کمیونیکیشن سروسز) پیغامات تک رسائی حاصل کر سکیں گے۔ یہ فیچر گوگل کے جدید اینڈرائیڈ میسجنگ سسٹم کا حصہ ہے، جو روایتی ایس ایم ایس کی نسبت تصاویر اور ویڈیوز کی بآسانی ترسیل کی سہولت فراہم کرتا ہے۔
اس نئے اپ ڈیٹ کا مقصد کمپنیوں کو اپنے ملازمین کی کمیونیکیشن کی نگرانی میں مدد دینا ہے تاکہ ادارے کے اندر ہونے والی بات چیت پر بہتر نظر رکھی جا سکے۔ گوگل کا کہنا ہے کہ اس فیچر کا مقصد مالکان کو درست اور مسلسل ریکارڈ فراہم کرنا ہے تاکہ وہ اپنے کاروبار میں ہونے والی سرگرمیوں کو بہتر طریقے سے ٹریک کر سکیں۔
کمپنیاں اس اپ ڈیٹ کو مختلف مقاصد کے لیے استعمال کر سکیں گی، جیسے کہ اندرونی تحقیقات، ایچ آر تنازعات یا حساس معلومات کی سکیورٹی کو یقینی بنانا۔ اس سے بزنس کمیونیکیشن کی مکمل مانیٹرنگ ممکن ہو جائے گی، جو کاروباری دنیا میں شفافیت اور تحفظ کے حوالے سے اہمیت رکھتا ہے۔
اگرچہ یہ فیچر کاروباری اداروں کے لیے مفید ثابت ہو سکتا ہے، لیکن اس پر پرائیویسی کے حوالے سے سوالات بھی اٹھائے جا رہے ہیں، کیونکہ ملازمین کی ذاتی بات چیت کی نگرانی سے متعلق تحفظات پیدا ہو سکتے ہیں۔