لاہور: وزیراعلیٰ پنجاب مریم نواز نے صوبے میں صفائی کے نظام کی بہتری کے لیے ایک جامع منصوبہ تیار کرنے کا فیصلہ کیا ہے۔ ان کا کہنا تھا کہ پنجاب میں کوڑے کرکٹ سے توانائی پیدا کرنے کا منصوبہ تیار کیا جائے تاکہ نہ صرف صفائی کے نظام کو بہتر بنایا جا سکے، بلکہ توانائی کے بحران پر قابو پانے میں بھی مدد ملے۔
مریم نواز کی زیر صدارت ہونے والے اجلاس میں "ستھرا پنجاب" منصوبے پر تفصیل سے بات چیت کی گئی۔ اجلاس میں یہ فیصلہ بھی کیا گیا کہ پنجاب میں صفائی کے نظام کو مزید موثر اور ماحول دوست بنایا جائے گا۔ وزیراعلیٰ نے کہا کہ "پنجاب میں صفائی کا اتنا بڑا نظام کسی معجزے سے کم نہیں، ہم اس کو مزید بہتر بنانے کے لیے بھرپور اقدامات کر رہے ہیں۔"
اجلاس میں فیصلہ کیا گیا کہ پنجاب میں صفائی کے عمل کو مزید بہتر بنانے کے لیے صفائی والی گاڑیاں اب ماحول دوست الیکٹرک وہیکلز ہوں گی، تاکہ فضائی آلودگی کو کم کیا جا سکے۔ مزید برآں، کمرشل ایریاز اور سڑکوں پر کوڑا کرکٹ پھیلانے والوں کے خلاف سخت قانونی کارروائی کی جائے گی اور انہیں جرمانے کی سزا دی جائے گی۔
مریم نواز نے کہا کہ "شہروں اور دیہات کی صفائی کا جامع نظام برسوں پہلے بننا چاہیے تھا، لیکن ہم نے زیرو سے آغاز کیا ہے۔ وقت کے ساتھ ساتھ ستھرا پنجاب پروجیکٹ میں بہتری لارہے ہیں اور عوام سے ملنے والے مثبت فیڈبیک سے ہمیں مزید حوصلہ مل رہا ہے۔"
وزیراعلیٰ پنجاب نے اپنے بیان میں مزید کہا کہ "پنجاب بھر میں ستھرا پنجاب پر عوام کی طرف سے اچھے کام کا مثبت فیڈ بیک آ رہا ہے، اور ہم اس پروجیکٹ کو مزید بہتر بنانے کے لیے ہر ممکن قدم اٹھائیں گے۔" اس پروجیکٹ کے تحت نہ صرف صفائی کے عمل میں بہتری لائی جائے گی، بلکہ پنجاب کو ایک صاف اور صحت مند ماحول فراہم کرنے کے لیے جدید ترین ٹیکنالوجی کا استعمال بھی کیا جائے گا۔