راولپنڈی: آرمی چیف جنرل عاصم منیر نے کہا ہے کہ پاکستان آرمی ملک کی خودمختاری اور سالمیت کے تحفظ کے لیے ہر وقت تیار ہے اور کسی بھی غیر ذمہ دارانہ مہم جوئی کا بھرپور طاقت کے ساتھ جواب دیا جائے گا۔پاک فوج کے شعبہ تعلقات عامہ (آئی ایس پی آر) کے مطابق، جنرل عاصم منیر کی زیر صدارت 267ویں کور کمانڈرز کانفرنس کا انعقاد کیا گیا، جس میں شرکا نے افواج پاکستان، قانون نافذ کرنے والے اداروں اور شہریوں کی عظیم قربانیوں کو خراج عقیدت پیش کیا۔
آئی ایس پی آر کے مطابق، کانفرنس میں شرکا نے داخلی اور خارجی خطرات کا تفصیل سے جائزہ لیا اور خاص طور پر لائن آف کنٹرول اور ورکنگ باؤنڈری کی موجودہ صورتحال پر تبادلہ خیال کیا۔ اس موقع پر یوم یکجہتی کشمیر پر کشمیری عوام کے ساتھ مکمل یکجہتی کا اظہار کیا گیا اور بھارت کی جانب سے غیر قانونی طور پر مقبوضہ جموں و کشمیر میں انسانی حقوق کی خلاف ورزیوں کی سخت مذمت کی گئی۔
آرمی چیف نے بھارت کی حالیہ اشتعال انگیز اور بے بنیاد بیانات کو مسترد کرتے ہوئے کہا کہ پاکستان کی فورسز ہر قسم کی مہم جوئی کا بھرپور جواب دینے کی صلاحیت رکھتی ہیں۔مزید برآں، فورم نے کشمیری عوام کے حق خودارادیت کی جدوجہد میں پاکستان کی غیر متزلزل حمایت کا اعادہ کیا اور اقوام متحدہ کی سلامتی کونسل کی متعلقہ قراردادوں کی مسلسل خلاف ورزیوں کی مذمت کی۔
کانفرنس میں شرکا نے افغانستان میں موجود فتنہ الخوارج کی جانب سے پاکستان میں دہشت گردی کی کارروائیوں کے لیے افغان سرزمین کے استعمال پر گہری تشویش کا اظہار کیا۔ اس بات پر زور دیا گیا کہ عبوری افغان حکومت کو فتنہ الخوارج کے خلاف ٹھوس اقدامات اٹھانے کی ضرورت ہے۔
آرمی چیف نے کہا کہ پاکستان اپنے عوام اور سرحدوں کے تحفظ کے لیے تمام ضروری اقدامات جاری رکھے گا۔