واشنگٹن : امریکی ایوان نمائندگان نے صدر ڈونلڈ ٹرمپ کے ٹیکس اور اخراجات کے بل کو منظوری دے دی ہے، جو پہلے امریکی سینیٹ میں بھی تنگ اکثریت سے پاس ہو چکا تھا۔ اس بل کے حق میں 218 اور مخالفت میں 214 ووٹ آئے۔
اب یہ بل صدر ٹرمپ کے دستخط کے لیے بھیجا جائے گا، جہاں وائٹ ہاؤس کے مطابق صدر شام 5 بجے اس پر دستخط کریں گے۔ اس بل کی منظوری کے بعد ٹرمپ کی کئی اہم داخلی پالیسیوں کو قانونی حیثیت حاصل ہو جائے گی، تاہم اس سے ملک کے قرض میں تقریباً 3.3 ٹریلین ڈالر کا اضافہ ہوگا۔
اس قانون کے تحت 2017 میں دی گئی ٹیکس کٹوتیوں میں توسیع کی جائے گی، ساتھ ہی ٹِپس اور اوورٹائم آمدنی پر نئے ٹیکس ریلیف بھی دیے جائیں گے۔ فوجی اخراجات اور امیگریشن اداروں کے بجٹ میں اضافہ کیا جائے گا، جب کہ غریب طبقے کے لیے صحت اور خوراک کی سہولیات میں کٹوتی کی جائے گی۔