ابوجا: نائیجیریا کے شمالی وسطی علاقے میں دریائے مالالے میں ایک کشتی کے حادثے میں تقریباً 60 افراد ہلاک ہوگئے ہیں۔ کشتی میں سوار کل 90 افراد میں سے کئی لاپتہ ہیں، اور ریسکیو آپریشن تاحال جاری ہے تاکہ مزید زندہ بچ جانے والوں یا لاشوں کو تلاش کیا جا سکے۔
ریسکیو حکام کا کہنا ہے کہ مرنے والوں میں خواتین اور بچے بھی شامل ہیں، اور اب تک 17 خواتین اور چار بچوں کی لاشیں نکالی جا چکی ہیں۔ حادثے کی بنیادی وجہ کشتی کا حد سے زیادہ بھر جانا بتایا گیا ہے۔
یہ واقعہ نائیجیریا میں اس طرح کے متعدد افسوسناک حادثات کا تازہ ترین ہے۔ کچھ دن پہلے ریاست سوکوٹو کے ضلع گاندھی میں بھی ایک کشتی ڈوبنے سے 17 افراد، جن میں خواتین اور بچے شامل تھے، ہلاک ہو گئے تھے۔ وہاں بھی کشتی پر گنجائش سے زیادہ افراد سوار تھے۔
نائیجیریا میں خستہ حال کشتیوں اور حد سے زائد مسافروں کے باعث دریائی حادثات معمول بن چکے ہیں۔ اس سال جولائی میں بھی 22 تاجر اسی طرح کے حادثے میں اپنی جانوں سے ہاتھ دھو بیٹھے تھے۔