پشاور: ملک بھر میں غیر قانونی طور پر مقیم افغان مہاجرین کو ڈی پورٹ کرنے کی تیاریاں مکمل کر لی گئی ہیں۔ محکمہ داخلہ پشاور کے مطابق، 260 افغان باشندوں کو مختلف شہروں سے خیبرپختونخوا پہنچایا جائے گا اور کاغذی کارروائی مکمل کرنے کے بعد انہیں طورخم بارڈر سے ڈی پورٹ کر دیا جائے گا۔
صوبائی محکمہ داخلہ کے مطابق، 41 افغان باشندے اوکاڑہ سے، 46 ساہیوال سے، 47 بہاولپور سے، 54 رحیم یار خان سے اور 18 ننکانہ سے منتقل کیے جائیں گے۔ مزید برآں، 17 افراد کو مظفرگڑھ اور 37 افراد کو حافظ آباد سے ہولڈنگ کیمپس منتقل کیا جائے گا۔
دوسری طرف، لاہور میں پہلے فیز میں 35 افغان تارکین وطن کو ڈی پورٹ کرنے کی تیاریاں مکمل ہو چکی ہیں۔ ضلعی انتظامیہ نے ان افراد کی رپورٹ محکمہ داخلہ کو بھجوا دی ہے۔ پولیس، ایف آئی اے اور نادرا کی رپورٹ کی بنیاد پر 305 افغان مہاجرین کو پاکستان میں قیام کی اجازت دی گئی ہے۔
35 افغان مہاجرین کو ڈی پورٹ کرنے کی کارروائی شروع ہو گی، اور محکمہ داخلہ پنجاب نے اس حوالے سے ضروری احکامات جاری کر دیے ہیں۔