آزاد کشمیر حکومت اور سیاسی قیادت کا بڑا فیصلہ: عوامی ایکشن کمیٹی کا احتجاجی بیانیہ مسترد، اپوزیشن بھی حکومت کے ساتھ یکسو

مظفرآباد : آزاد جموں و کشمیر کی حکومت، تمام سیاسی قیادت اور اپوزیشن جماعتوں نے جوائنٹ عوامی ایکشن کمیٹی (JAAC) کا احتجاجی بیانیہ مکمل طور پر مسترد کرتے ہوئے اسے گمراہ کن قرار دے دیا ہے۔
حکومتی اور سیاسی رہنماؤں کا کہنا ہے کہ عوامی مسائل کی آڑ میں عوام کو گمراہ کرنے اور بے بنیاد بیانیے کو پھیلانے کی کوشش کی جا رہی ہے، تاہم اب تمام حقائق عوام کے سامنے کھل کر آ چکے ہیں۔
 آزاد کشمیر کی پوری سیاسی قیادت اور اپوزیشن جماعتیں جے اے اے سی (JAAC) کی ہٹ دھرمی اور احتجاجی سیاست کے خلاف مکمل طور پر ایک پیج پر اور یکسو ہیں۔ حکومتی نمائندوں کا کہنا ہے کہ حکومت نے ہمیشہ مذاکرات، ریلیف کی فراہمی اور مطالبات پر عمل درآمد کا مثبت راستہ اختیار کیا۔
سیاسی قیادت نے افسوس کا اظہار کرتے ہوئے کہا کہ عوامی ایکشن کمیٹی نے حکومت کی طرف سے دکھائی جانے والی لچک کا جواب مثبت انداز میں دینے کے بجائے، دباؤ ڈالنے اور سڑکوں کی سیاست (احتجاج) کو ترجیح دی۔
 حکومت اور تمام سیاسی اسٹیک ہولڈرز کا ماننا ہے کہ ریاست کے مفاد اور امن و امان کے لیے اب احتجاجی سیاست کے بجائے آئینی اور قانونی راستے کو اپنایا جانا چاہیے، کیونکہ عوام اب حقیقت سے پوری طرح باخبر ہو چکے ہیں۔