لاہور: پاکستان پیپلز پارٹی کے چیئرمین بلاول بھٹو زرداری نے حالیہ سیلاب سے متاثرہ علاقوں کا دورہ کیا، جہاں انہوں نے متاثرین میں راشن تقسیم کیا اور ان کے مسائل سنے۔ بلاول بھٹو نے اس موقع پر کہا کہ سیلاب کی تباہ کاریاں بہت شدید ہیں، اور اس ہنگامی صورتحال میں وزیراعلیٰ پنجاب مریم نواز اور ان کی ٹیم کی کوششیں قابل تحسین ہیں۔
انہوں نے متاثرہ افراد اور کسانوں سے ملاقات کی، جنہوں نے فصلوں کی تباہی، نقل مکانی اور روزگار کے مسائل پر بلاول بھٹو کو آگاہ کیا۔
بعد ازاں پریس کانفرنس کرتے ہوئے بلاول بھٹو زرداری نے کہا:
"موجودہ بحران اتنا بڑا ہے کہ پنجاب حکومت تنہا اس سے نمٹنے کی سکت نہیں رکھتی، اس لیے وفاقی حکومت کو فوری طور پر اپنا کردار ادا کرنا ہوگا۔"
انہوں نے حکومت سے مطالبہ کیا کہ:
فوری طور پر زرعی ایمرجنسی کا اعلان کیا جائے
کسانوں کو بیج، کھاد اور دیگر زرعی سہولیات میں رعایت دی جائے
بینظیر انکم سپورٹ پروگرام کے ذریعے متاثرین کو مالی معاونت فراہم کی جائے
بھارت پر پانی روکنے کا الزام
بلاول بھٹو نے بھارت کی آبی پالیسیوں پر شدید تحفظات کا اظہار کرتے ہوئے کہا:
"مودی حکومت نے ایک بار پھر سندھ طاس معاہدے کی خلاف ورزی کی ہے اور حالیہ سیلاب کے دوران دریاؤں کے بہاؤ سے متعلق ڈیٹا پاکستان کو فراہم نہیں کیا، جو عالمی قوانین کی صریح خلاف ورزی ہے۔"
انہوں نے کہا کہ بھارت کا یہ رویہ دراصل پانی کو ہتھیار کے طور پر استعمال کرنے کے مترادف ہے، جس کا مقصد پاکستان کے عوام کو نقصان پہنچانا ہے۔ انہوں نے عالمی برادری سے اپیل کی کہ بھارت کو سندھ طاس معاہدے پر عملدرآمد کا پابند بنایا جائے۔
آخر میں، بلاول بھٹو نے پیپلز پارٹی کے کارکنان کو ہدایت دی کہ وہ متاثرہ علاقوں میں بھرپور ریلیف سرگرمیوں میں حصہ لیں اور عوام کی خدمت کو ترجیح دیں۔