واشنگٹن : امریکی صدر ڈونلڈ ٹرمپ اور ٹیسلا کے سربراہ ایلون مسک کے خلاف "ہینڈز آف" کے نام سے احتجاجی تحریک کا آغاز ہوگیا ہے۔ اس تحریک میں امریکا کی 50 ریاستوں کے ساتھ ساتھ کینیڈا، برطانیہ، فرانس، جرمنی، پرتگال اور میکسیکو میں 1200 مقامات پر احتجاجی مظاہروں کا انعقاد کیا جا رہا ہے۔
احتجاج میں شہری حقوق کی تنظیموں، مزدور یونینوں اور مختلف اداروں کے افراد نے شرکت کی، جنہوں نے ٹرمپ حکومت کی امیگریشن پالیسیوں، تجارتی محصولات، تعلیمی بجٹ میں کٹوتیوں اور ایلون مسک کی سربراہی میں وفاقی ملازمتوں میں 200,000 سے زائد کٹوتیوں کے خلاف اپنے تحفظات کا اظہار کیا ہے۔ مظاہرین نے نعرے لگائے اور امریکا میں حقیقی جمہوریت کی بحالی اور عوام مخالف پالیسیاں واپس لینے کا مطالبہ کیا۔
مظاہرین کا کہنا تھا کہ ٹرمپ کی پالیسیوں سے دنیا کے لیے خطرات پیدا ہو رہے ہیں، اور ان کا مطالبہ تھا کہ ایلون مسک کو ملک بدر کیا جائے کیونکہ وہ عوام کے مفاد کے خلاف کام کر رہے ہیں۔
یورپ میں بھی اس تحریک کی بازگشت سنائی دی، جہاں برلن، فرینکفرٹ، پیرس اور لندن میں مقیم امریکی شہریوں نے احتجاجی ریلیوں میں شرکت کی۔ برلن میں ٹیسلا کے شوروم کے باہر مظاہرین نے پلے کارڈز اٹھا رکھے تھے جن پر "ایلون، چپ رہو، کسی نے تمہیں ووٹ نہیں دیا" جیسے نعرے درج ہیں ۔