نیویارک : ناسا نے اعلان کیا ہے کہ کریو-12 مشن کے ذریعے انٹرنیشنل سپیس اسٹیشن (ISS) جانے والے اور آرٹیمس II مشن کے ذریعے چاند کے قریب فلائی بائی کرنے والے خلا باز پہلی بار خلا میں جدید سمارٹ فونز لے کر جائیں گے۔ اس اقدام کا مقصد خلا بازوں کو اپنے خصوصی لمحوں کی تصاویر اور ویڈیوز ریکارڈ کرنے کی سہولت دینا ہے تاکہ وہ اپنے تجربات دنیا کے ساتھ شیئر کر سکیں۔
یہ پہلی بار ہے جب خلا باز اپنی ذاتی سمارٹ فونز کو خلائی مشنوں میں لے جا سکیں گے۔ ناسا نے اس بات کو یقینی بنانے کے لیے سخت حفاظتی اقدامات کیے ہیں کہ یہ فونز کسی بھی اہم سسٹم کے کام میں مداخلت نہ کریں۔
پہلے، سوئز اور سپیس شٹل مشنز کے دوران سمارٹ فونز کا استعمال ممکن نہیں تھا، مگر جدید ٹیکنالوجی اور ناسا کی حفاظتی جانچ کے بعد یہ ممکن ہو گیا ہے۔ اس سے نہ صرف خلا بازوں کے لیے تصاویر اور ویڈیوز ریکارڈ کرنا آسان ہوگا، بلکہ ان کے حوصلے اور کام کے جذبے میں بھی اضافہ ہوگا۔
یہ اقدام ناسا کے خلائی مشنز میں جدید ٹیکنالوجی کے بڑھتے ہوئے استعمال اور مؤثر وسائل کے استعمال کی جانب ایک اہم قدم ہے۔