اسلام آباد : قومی اسمبلی کا اجلاس آج شام 5 بجے شروع ہوگا، اور سیکرٹریٹ نے اس کے 12 نکاتی ایجنڈے کا اعلان کر دیا ہے۔ اجلاس میں وقفہ سوالات اور توجہ دلاؤ نوٹسز پر جوابات دیے جائیں گے۔
ایجنڈے کے مطابق وزیر داخلہ سوسائٹی رجسٹریشن ترمیمی آرڈیننس میں مزید 120 دن کی توسیع کی قرارداد پیش کریں گے۔ وزیر تعلیم فیڈرل بورڈ اینڈ سیکنڈری ایجوکیشن ایکٹ 1975 میں ترمیم کی تجویز پیش کریں گے، جبکہ وزیر پارلیمانی امور خصوصی اقتصادی زونز اتھارٹی ترمیمی بل 2025 بھی پیش کریں گے۔
اس کے علاوہ، قومی کمیشن برائے انسانی حقوق کی سال 2023 اور 2024 کی رپورٹس بھی ایوان میں پیش کی جائیں گی۔ پارلیمنٹ کے دونوں ایوانوں سے صدر کے خطاب پر اظہار تشکر کی تحریک بھی ایجنڈے میں شامل ہے، جسے وزیر پارلیمانی امور ڈاکٹر طارق ایوان میں پیش کریں گے۔