ملک بھر میں ہیٹ ویو کا ہنگامی الرٹ جاری: اندرونِ سندھ اور بلوچستان میں پارہ 51 ڈگری تک جانے کا امکان، کراچی میں بھی شدید گرمی

اسلام آباد:محکمہ موسمیات نے ملک کے بیشتر حصوں میں شدید ترین گرمی کی لہر (ہیٹ ویو) کا الرٹ جاری کر دیا ہے۔ ملک بھر میں سورج آگ برسانے کو تیار ہے اور گرمی کی یہ شدید لہر آج سے 12 جون تک بلا تعطل جاری رہے گی۔
اندرونِ سندھ اور بلوچستان میں گرمی کی شدت سب سے زیادہ ہوگی، جہاں زیادہ سے زیادہ درجہ حرارت 51 ڈگری سینٹی گریڈ تک پہنچنے کا شدید امکان ظاہر کیا گیا ہے۔
 صوبہ پنجاب کے مختلف اضلاع میں بھی سورج کا قہر جاری رہے گا، جہاں پارہ 48 ڈگری سینٹی گریڈ کی حد کو چھو سکتا ہے۔کراچی میں پارہ 45 ڈگری: ساحلی شہر کراچی بھی اس ہیٹ ویو کی زد میں رہے گا، جہاں درجہ حرارت 45 ڈگری سینٹی گریڈ تک جانے کی پیش گوئی کی گئی ہے۔این ڈی ایم اے اور محکمہ صحت نے شہریوں کو سختی سے ہدایت کی ہے کہ وہ خاص طور پر دوپہر کے وقت بلا ضرورت گھروں سے نکلنے سے گریز کریں۔ ہلکے رنگ کے کپڑے پہنیں اور ہیٹ اسٹروک سے بچنے کے لیے پانی اور او آر ایس (ORS) کا استعمال زیادہ سے زیادہ کریں۔