ممبئی : بالی ووڈ کی معروف ہدایتکارہ اور فلم ساز فرح خان نے اپنے وی لاگ میں ایک دلچسپ راز فاش کیا ہے کہ فلم 'میں ہوں نا' کے لیے ابتدا میں عائشہ تاکیا کو مرکزی کردار کے لیے منتخب کیا گیا تھا، لیکن شوٹنگ سے صرف دو ہفتے قبل انہوں نے اس فلم کو چھوڑ دیا اور امتیاز علی کی فلم سائن کر لی۔
فرح خان نے اس وی لاگ میں بتایا کہ جب وہ اداکارہ امریتا راؤ کے گھر پہنچیں، تو انہیں یہ جان کر حیرت ہوئی کہ فلم کی شوٹنگ شروع ہونے میں صرف دو ہفتے رہ گئے تھے، مگر ابھی تک مرکزی کردار کے لیے کوئی ہیروئن منتخب نہیں کی گئی تھی۔
انہوں نے ہنستے ہوئے کہا، "دو ہفتے پہلے تک شوٹنگ تو طے تھی، لیکن ہیروئن کا انتخاب نہیں ہو پایا تھا۔" ان کے مطابق، دارجلنگ کا سینٹ پال اسکول بک کر لیا گیا تھا اور تمام لوگ وہاں پہنچ چکے تھے۔ عائشہ تاکیا کو ابتدا میں فائنل کر لیا گیا تھا، مگر وہ امتیاز علی کی فلم 'سوچا نہ تھا' میں کام کرنے کے لیے چلی گئیں اور دو مہینے تک اس فلم کی شوٹنگ میں مصروف ہو گئیں۔ فرح خان نے بتایا کہ "میں انہیں فون کرتی تھی کہ تمہارے کاسٹیوم اور سینز تیار ہیں، لیکن وہ جواب دیتی، 'امتیاز سر ابھی شوٹنگ کر رہے ہیں، میں نہیں آ سکتی۔'"
اس کے بعد، فرح خان نے گوری خان کے مشورے پر امریتا راؤ کو مرکزی کردار کے لیے منتخب کرنے کا فیصلہ کیا۔ فرح نے کہا، "جب میں نے امریتا کو دیکھا، تو وہ بالکل میرے کردار جیسی نہیں لگ رہی تھیں کیونکہ وہ بہت سادہ سی نظر آ رہی تھیں۔ لیکن جب میں نے انہیں فلم کا جذباتی سین دیا، تو وہ کیمرے کے سامنے شعلہ بن گئیں۔"
فرح خان کے مطابق، امریتا میں وہ خاص بات تھی جو سری دیوی میں تھی، یعنی کیمرے کے سامنے جادو، مگر عام زندگی میں وہ بہت سادہ اور معمولی تھیں۔ امریتا راؤ نے 'میں ہوں نا' میں سنجنا بکشی کا کردار ادا کیا، جو ناظرین میں بہت مقبول ہوا۔
فلم میں شاہ رخ خان اور سشمیتا سین نے اہم کردار ادا کیے اور 'میں ہوں نا' نے ریلیز کے بعد بڑی کامیابی حاصل کی، جس نے تقریباً 70 کروڑ روپے کی کمائی کی۔
دوسری طرف، عائشہ تاکیا نے 'میں ہوں نا' چھوڑ کر امتیاز علی کی فلم 'سوچا نہ تھا' سائن کی، جس میں ابھے دیول نے اپنے کیریئر کا آغاز کیا۔ تاہم، یہ فلم باکس آفس پر توقعات کے مطابق کامیاب نہ ہو سکی۔