پنجاب میں ہیٹ ویو کا خطرہ،پی ڈی ایم اے کا الرٹ جاری

لاہور : پی ڈی ایم اے پنجاب نے رواں ماہ کے دوران درجہ حرارت میں اضافے اور بارشوں کے حوالے سے الرٹ جاری کیا ہے۔ ترجمان پی ڈی ایم اے کے مطابق آج سے 11 اپریل تک پنجاب کے مختلف اضلاع میں گرد آلود ہوائیں اور گرج چمک کے ساتھ بارش ہونے کا امکان ہے۔

پی ڈی ایم اے کے مطابق لاہور، قصور، سیالکوٹ، نارووال، اوکاڑہ، فیصل آباد، ٹوبہ ٹیک سنگھ، جھنگ، خوشاب، سرگودھا اور میانوالی میں آندھی اور بارش کی پیش گوئی کی گئی ہے۔

دوسری طرف، درجہ حرارت میں نمایاں اضافے کا آغاز ہو چکا ہے، اور آج کم سے کم درجہ حرارت 23 جبکہ زیادہ سے زیادہ 37 ڈگری سینٹی گریڈ تک جانے کا امکان ہے۔ شہر کا موجودہ درجہ حرارت 28 ڈگری سینٹی گریڈ ریکارڈ کیا گیا ہے، اور ہوا میں نمی کا تناسب 55 فیصد تک پہنچ چکا ہے۔ محکمہ موسمیات کے مطابق ہوا کی رفتار 8 کلومیٹر فی گھنٹہ ہے۔

ڈی جی پی ڈی ایم اے نے بتایا کہ رواں ماہ کے دوران درجہ حرارت میں 4 سے 7 ڈگری تک اضافے کی توقع ہے، جس سے پنجاب کے میدانی علاقوں میں گرمی کی شدت میں اضافہ ہوگا۔ وزیر اعلیٰ پنجاب کی ہدایت پر ضلعی انتظامیہ کو الرٹ جاری کر دیا گیا ہے۔