لاہور:پنجاب پولیس نے لاہور اور صوبہ بھر سے 5020 غیر قانونی طور پر مقیم افراد کو ڈی پورٹ کر دیا ہے، یہ اقدام صوبے میں غیر قانونی تارکین وطن کے انخلا کے لیے جاری مہم کا حصہ ہے۔ ترجمان پنجاب پولیس کے مطابق 7672 افراد کو ہولڈنگ سنٹرز میں منتقل کیا گیا، جن میں سے 2652 افراد ابھی بھی ہولڈنگ پوائنٹس پر موجود ہیں۔ لاہور میں 5 اور صوبے بھر میں 46 ہولڈنگ سنٹرز قائم کیے گئے ہیں تاکہ غیر قانونی مقیم افراد کو ان کے وطن واپس بھیجا جا سکے۔
آئی جی پنجاب ڈاکٹر عثمان انور نے اس مہم کے دوران انسانی حقوق کے تحفظ کی یقین دہانی کرائی ہے اور کہا کہ سیکیورٹی کے تمام انتظامات ہائی الرٹ ہیں۔ انہوں نے مزید کہا کہ 89 ہزار غیر قانونی مقیم افراد کا ڈیٹا موجود ہے اور وفاقی حکومت و حساس ادارے اس مہم کی نگرانی کر رہے ہیں۔ اسپیشل برانچ، سی ٹی ڈی اور انٹیلی جنس بیسڈ انفارمیشن کے ذریعے غیر قانونی مقیم افراد کی نشاندہی کی جا رہی ہے۔