لزبن: شیعہ اسماعیلی مسلمانوں کے 49 ویں موروثی امام، مرحوم پرنس کریم الحسینی آغا خان چہارم کی نماز جنازہ پرتگال کے دارالحکومت لزبن میں ادا کر دی گئی، جس میں پاکستان کے وزیر خزانہ سینیٹر محمد اورنگزیب نے بھی شرکت کی۔
وزارت خزانہ کے جاری کردہ اعلامیے کے مطابق وزیر خزانہ نے نماز جنازہ میں شرکت کے علاوہ شیعہ اسماعیلی مسلمانوں کے 50 ویں امام شہزادہ رحیم الحسینی آغا خان پنجم سے ملاقات کی۔ اس موقع پر انہوں نے صدر، وزیر اعظم اور پاکستانی عوام کی جانب سے تعزیت کا اظہار کیا اور مرحوم آغا خان کی عالمی خدمات کو خراج تحسین پیش کیا۔
وزیر خزانہ نے آغا خان ڈویلپمنٹ نیٹ ورک کی انسانی ترقی، معاشی بہتری، ثقافتی ورثے کے تحفظ اور پائیدار ترقی میں کردار کو سراہا۔ انہوں نے پرنس کریم آغا خان چہارم کے انتقال کو ان کے خاندان، پیروکاروں اور دنیا بھر کے محروم طبقات کے لیے ایک بڑا نقصان قرار دیا۔
پاکستانی حکومت نے پرنس کریم آغا خان کی آخری رسومات کے موقع پر 8 فروری 2025 کو قومی سوگ کا دن قرار دیا، جس کے تحت ملک بھر اور بیرون ملک پاکستانی سفارت خانوں میں قومی پرچم سرنگوں رہا۔