ڈیرہ غازی خان :پنجاب کے ضلع ڈیرہ غازی خان میں واقع بارڈر چیک پوسٹ پر خوارجی دہشت گردوں کا ایک اور حملہ ناکام بنا دیا گیا ہے۔ پنجاب پولیس کے ترجمان کے مطابق، 15 سے 20 دہشت گردوں نے چیک پوسٹ لکھانی پر سحری کے وقت حملہ کیا، جو خیبرپختونخوا سے ٹولیوں کی صورت میں آئے تھے۔
دہشت گردوں نے اس حملے میں راکٹوں اور بھاری ہتھیاروں کا استعمال کیا، تاہم پولیس کی جانب سے فوراً جوابی کارروائی کی گئی اور تھرمل امیج کیمروں کی مدد سے دہشت گردوں کی درست نشاندہی کی گئی۔ پولیس نے مشین گنز اور مارٹر کے ذریعے دہشت گردوں کو جواب دیا، جس کے نتیجے میں دہشت گرد چیک پوسٹ کے قریب پہنچنے میں ناکام ہو گئے اور انہیں پسپائی اختیار کرنی پڑی۔
ترجمان نے کہا کہ جوابی کارروائی کے دوران دہشت گردوں کو بھاری جانی نقصان پہنچا ہے۔ آر پی او ڈیرہ غازی خان کیپٹن (ر) سجاد حسن خان نے کہا کہ پولیس اور دیگر اداروں کی جانب سے سرحدی علاقوں میں سرچ آپریشن جاری ہے۔
آئی جی پنجاب ڈاکٹر عثمان انور نے پولیس کے جوانوں کی فوری کارروائی کو سراہا اور کہا کہ "ہم دہشت گردوں کو ہر محاذ پر شکست دیں گے۔" انہوں نے کہا کہ "پنجاب پولیس نے اب تک خوارجی دہشت گردوں کے 19 حملے ناکام بنائے ہیں اور عوام کے جان و مال کی حفاظت کے لیے ہر ممکن قدم اٹھایا جائے گا۔"
وزیراعلیٰ پنجاب کے مطابق، پنجاب حکومت نے سرحدی چوکیوں کو جدید اسلحہ فراہم کیا ہے، جس کے باعث دہشت گرد اپنے مذموم مقاصد میں کامیاب نہیں ہو سکے۔