اسلام آباد: اقوام متحدہ نے کہا ہے کہ پاکستان کو منشیات کے خلاف جنگ میں اکیلا نہیں چھوڑا جا سکتا۔ اقوام متحدہ کے ادارہ برائے منشیات و جرائم (UNODC) نے پاکستان کی منشیات کے خلاف اقدامات کا عالمی سطح پر اعتراف کیا ہے۔
پاکستان میں اقوام متحدہ کے ادارہ برائے منشیات و جرائم کے نمائندے ٹرولز ویسٹر نے کہا کہ پاکستان کو فرنٹ لائن ملک قرار دیا ہے جو منشیات کی اسمگلنگ کے خلاف جنگ میں اہم کردار ادا کر رہا ہے۔ ویسٹر نے پاکستان کی اینٹی نارکوٹکس فورس کی کامیابیوں کو سراہتے ہوئے کہا کہ یہ فورس منشیات کے خلاف جنگ میں اہم پیشرفت کر رہی ہے۔
انہوں نے بتایا کہ افغانستان میں پوست اور ہیروئن کی پیداوار کی جگہ اب مصنوعی منشیات کی لیبارٹریاں قائم ہو رہی ہیں، جو ایک نیا چیلنج ہے۔ تاہم، پاکستان کی اس جدوجہد میں اقوام متحدہ کا ادارہ بھرپور تعاون فراہم کرے گا۔
ویسٹر نے کہا کہ اقوام متحدہ نے منشیات کے خلاف جنگ کے حوالے سے ایک اہم روڈ میپ جاری کیا ہے، اور اس میں پاکستان کا کردار بہت اہم ہے۔ انہوں نے مزید کہا کہ عالمی برادری کا پاکستان کے ساتھ اشتراک منشیات کی اسمگلنگ کو روکنے کے لیے انتہائی ضروری ہے۔
اقوام متحدہ کے نمائندہ خصوصی نے اس بات کا بھی ذکر کیا کہ پاکستان نے گزشتہ ایک سال میں 365 میٹرک ٹن منشیات اور کیمیکلز ضبط کیے ہیں، جو اس کی کامیاب کوششوں کا واضح ثبوت ہیں۔ ویسٹر نے کہا کہ منظم جرائم کی بدلتی حکمت عملی کے تحت پاکستان کا کردار اس لڑائی میں کلیدی ہے۔
اقوام متحدہ نے اپنے عزم کا اعادہ کیا ہے کہ پاکستان کو منشیات کے خلاف جنگ میں تنہا نہیں چھوڑا جائے گا اور عالمی سطح پر اس کی بھرپور حمایت جاری رکھی جائے گی۔