گلگت: انسپکٹر جنرل پولیس گلگت بلتستان نے پولیس فورس کے اہلکاروں پر سوشل میڈیا پلیٹ فارم ٹک ٹاک کے استعمال پر مکمل پابندی عائد کر دی ہے۔ اس اقدام کا مقصد فورس کے ڈسپلن، یکسانیت اور وقار کو برقرار رکھنا ہے۔
آئی جی پولیس کے دفتر سے جاری کردہ نوٹیفکیشن میں کہا گیا ہے کہ کوئی بھی پولیس افسر یا اہلکار ٹک ٹاک استعمال نہیں کرے گا، اور خلاف ورزی کی صورت میں متعلقہ اہلکار کے خلاف سخت محکمانہ کارروائی کی جائے گی۔
نوٹیفکیشن میں تمام ضلعی پولیس افسران اور یونٹ ہیڈز کو ہدایت کی گئی ہے کہ وہ اپنے ماتحت عملے کو اس پابندی سے آگاہ کریں اور اس کی سختی سے نگرانی کریں۔
یہ اقدام ایسے وقت میں سامنے آیا ہے جب حالیہ مہینوں میں ملک کے مختلف حصوں میں پولیس اہلکاروں کی جانب سے سوشل میڈیا کے غلط استعمال پر تنقید کی جا رہی ہے۔ جولائی میں اسلام آباد میں دو کانسٹیبلز کو یونیفارم میں ٹک ٹاک ویڈیوز بنانے پر معطل کیا گیا تھا، جبکہ درجنوں اہلکاروں کو اپنے اکاؤنٹس بند کرنے کی وارننگ دی گئی تھی۔
مارچ 2024 میں پنجاب پولیس نے بھی اپنے اہلکاروں کو ذاتی سوشل میڈیا اکاؤنٹس پر ریاست مخالف یا توہین آمیز خیالات کے اظہار سے روکنے کی ہدایات جاری کی تھیں۔
ستمبر 2024 میں، اسلام آباد اور پنجاب پولیس نے باضابطہ سوشل میڈیا پالیسیز متعارف کرائی تھیں جن کے تحت اہلکاروں کو سوشل میڈیا پر کسی بھی قسم کی رائے یا بیان دینے سے منع کیا گیا تھا، اور ان کی آن لائن سرگرمیوں کی نگرانی کی ذمہ داری متعلقہ افسران کو سونپی گئی تھی۔
وفاقی حکومت کی جانب سے بھی متعدد بار سرکاری ملازمین کو سوشل میڈیا پر سیاسی یا مذہبی خیالات کے اظہار سے گریز کرنے کی ہدایات دی گئی ہیں۔