اسلام آباد : وفاقی وزیر داخلہ محسن نقوی نے کہا ہے کہ دہشتگردی کے خلاف جنگ صرف پاکستان کی نہیں، بلکہ عالمی سطح پر اس سے نمٹنے کے لیے عالمی برادری کو پاکستان کے ساتھ تعاون کرنا ہوگا۔ یہ بات انہوں نے امریکی محکمہ خارجہ کے سینئر عہدیدار ایریک میئر سے ملاقات کے دوران کہی، جو پاکستان کے دورے پر آئے تھے۔
اس ملاقات کے دوران دونوں فریقین نے پاکستان اور امریکا کے تعلقات، باہمی دلچسپی کے امور اور دو طرفہ تعاون پر تفصیلی گفتگو کی۔ خاص طور پر دہشت گردی، سمگلنگ اور انسداد منشیات کے شعبوں میں تعاون بڑھانے کے حوالے سے بات چیت کی گئی۔
ایریک میئر نے پاکستان کی جانب سے مطلوب دہشتگرد شریف اللہ کی گرفتاری میں تعاون پر شکریہ ادا کیا اور جعفر ایکسپریس پر دہشت گردوں کے حملے کی مذمت کرتے ہوئے جانی نقصان پر افسوس کا اظہار کیا۔ انہوں نے متاثرہ خاندانوں سے تعزیت بھی کی۔
وزیر داخلہ محسن نقوی نے کہا کہ جون میں اسلام آباد میں ہونے والا مشترکہ کاونٹر ٹیررازم ڈائیلاگ دہشتگردی کے خلاف تعاون میں مزید اضافہ کرے گا۔ انہوں نے ایریک میئر کو انسداد دہشتگردی کے حوالے سے پاکستان کے اقدامات سے آگاہ کیا۔
محسن نقوی نے اس بات پر زور دیا کہ دہشت گردی کی جنگ پاکستان کی نہیں، عالمی سطح پر اس کا مقابلہ کرنا ضروری ہے، اور اس میں عالمی برادری کا تعاون ضروری ہے۔ انہوں نے کہا کہ پاکستان منرلز انویسٹمنٹ فورم کے ذریعے امریکی کمپنیاں پاکستان میں سرمایہ کاری کے وسیع مواقعوں سے فائدہ اٹھا سکتی ہیں۔
اس کے علاوہ ایریک میئر نے پاکستان منرلز انویسٹمنٹ فورم 2025 کے تحت پیش کیے گئے مواقع میں دلچسپی کا اظہار کیا۔ ملاقات میں قائم مقام امریکی سفیر نیٹلی بیکر، وزیر مملکت داخلہ طلال چودھری اور سیکرٹری داخلہ خرم آغا بھی موجود تھے۔