اسلام آباد : پاکستان نے اپنے تجارتی تعلقات کو مزید مضبوط بنانے اور امریکا کی جانب سے لگائے گئے نئے ٹیرف پر مذاکرات کے لیے اعلیٰ سطح کا وفد امریکا بھیجنے کا فیصلہ کیا ہے۔ وزیراعظم شہباز شریف کی زیر صدارت اجلاس میں ملکی برآمدات میں اضافے اور امریکا کی جانب سے عائد کیے گئے نئے ٹیرف سے متعلق جائزہ لیا گیا۔
اجلاس میں یہ بھی بتایا گیا کہ امریکا میں پاکستانی سفارتخانہ مسلسل امریکی حکومت کے ساتھ رابطے میں ہے اور امریکا کے ساتھ تجارتی تعلقات کو مزید بہتر بنانے کے لیے مذاکرات جاری ہیں۔ اجلاس کے دوران سٹیئرنگ کمیٹی اور ورکنگ گروپ کی رپورٹ پیش کی گئی اور امریکا کے نئے ٹیرف پر ایک مجوزہ لائحہ عمل بھی پیش کیا گیا۔
وزیراعظم شہباز شریف نے امریکا کے ساتھ مذاکرات کے دوران معروف کاروباری شخصیات اور برآمد کنندگان کی شمولیت کی ہدایت کی تاکہ پاکستان اور امریکا کے تجارتی تعلقات کو مزید فروغ دیا جا سکے۔ انہوں نے کہا کہ امریکا کے ساتھ پاکستان کے تجارتی تعلقات طویل عرصے پر محیط ہیں اور حکومت امریکا کے ساتھ شراکت داری کو مزید مستحکم کرنے کی خواہاں ہے۔
اجلاس میں نائب وزیراعظم و وزیرِ خارجہ اسحاق ڈار، وفاقی وزراء احد خان چیمہ، محمد اورنگزیب، علی پرویز ملک، مشیر وزیراعظم سید توقیر شاہ، معاونین خصوصی طارق فاطمی، ہارون اختر، وزیرِ اعظم کے کوآرڈینیٹر رانا احسان افضل اور دیگر اعلیٰ حکام نے شرکت کی۔