لاہور: وزیراعلیٰ پنجاب مریم نواز شریف کی زیر صدارت ایک خصوصی اجلاس ہوا جس میں آسان کاروبار فنانس اور آسان کاروبار کارڈ پراجیکٹس کی پیش رفت کا جائزہ لیا گیا۔ اجلاس میں وزیرِ اعلیٰ نے آسان کاروبار فنانس سکیم کو مزید سہولت فراہم کرنے کی ہدایت دیتے ہوئے قرض دینے کے عمل کو آسان بنانے کی ضرورت پر زور دیا۔
بریفنگ میں بتایا گیا کہ قرض حاصل کرنے والے افراد میں ٹرانسپورٹ، فارماسوٹیکل اور چھوٹے کاروبار کرنے والے شامل ہیں، اور اس سکیم کے تحت 80 ہزار سے زائد افراد کی قرض کی درخواستیں منظور کی جا چکی ہیں، جن میں سے 34 ہزار کاروباری افراد کو لون فراہم کیا جا چکا ہے۔
وزیراعلیٰ مریم نواز نے اس موقع پر نئے یونٹ قائم کرنے والے کاروباری افراد کی حوصلہ افزائی کی اور قرض حاصل کرنے والے تمام افراد سے فیڈ بیک لینے کی ہدایت کی۔ انہوں نے قرض لینے والے افراد سے فون پر بات کر کے ان کے تجربات اور قرض حاصل کرنے کے مراحل کے بارے میں دریافت کیا۔
وزیراعلیٰ مریم نواز نے کریانہ سٹور کے کاروباری شخص عدنان علی سے بات کرتے ہوئے اس کو شکریہ کا اظہار کیا، جس نے آسان کاروبار فنانس کارڈ کے ذریعے 3 لاکھ 55 ہزار روپے حاصل کیے تھے اور ان پیسوں سے اپنے کاروبار کو مزید بڑھایا تھا۔ اسی طرح تونسہ سے زرعی مداخل کا کاروبار کرنے والے معین الدین نے بھی شکریہ ادا کیا اور بتایا کہ ایک لاکھ 56 ہزار روپے کی مدد سے اس نے اپنے کاروبار میں بہتری لائی۔
اسی طرح، لودھراں کے نواحی گاؤں 104 میں کریانہ کی دکان چلانے والے ندیم احمد نے بھی آسان کاروبار فنانس سکیم کے ذریعے 8 لاکھ روپے حاصل کیے جس سے اس کے کاروبار میں نمایاں اضافہ ہوا۔
وزیراعلیٰ مریم نواز شریف نے اس سکیم میں شامل افراد کی کامیابی پر خوشی کا اظہار کیا اور انہیں مزید ترقی کی دعا دی۔ انہوں نے اس بات پر زور دیا کہ حکومت آسان کاروبار فنانس سکیم کو مزید وسیع کرے گی تاکہ زیادہ سے زیادہ افراد فائدہ اٹھا سکیں۔