امریکا :اوہائیو ندی میں سیلاب آنے کے بعد کینٹکی کے ایک ریسٹورنٹ کے مالکان نے گندے پانی کو عمارت میں داخل ہونے سے روکنے کے لیے انوکھا طریقہ اختیار کیا۔ پراسپیکٹ میں واقع "کیپٹن کوارٹرز ریور سائیڈ گرل" کے شریک مالک اینڈریو ماسٹرسن نے فیس بک پر ایک لائیو ویڈیو شیئر کی، جس میں دکھایا گیا کہ وہ اور ان کی ٹیم سیلابی پانی کو ریسٹورنٹ سے باہر نکالنے کی کوشش کر رہے ہیں۔
اینڈریو ماسٹرسن اور ان کے عملے نے ریسٹورنٹ کو تقریباً 6 فٹ صاف میٹھے پانی سے بھرنے کے لیے سنک، ٹونٹی اور کنویں کے پانی کے پمپ کا استعمال کیا تاکہ گندہ پانی اندر نہ آئے۔ ماسٹرسن نے ویڈیو میں بتایا کہ "ہم نے باورچی خانے کے آلات اور بجلی کے پینلز کو پہلے ہی منقطع کر دیا تھا تاکہ سیلاب کے اثرات کم سے کم ہوں۔"
انہوں نے مزید کہا کہ اگر یہ حکمت عملی کامیاب ہو گئی تو یہ ریسٹورنٹ کو صفائی کے مہنگے اور وقت ضائع کرنے والے کاموں سے بچا سکتی ہے۔