واشنگٹن : امریکی صدر ڈونلڈ ٹرمپ نے خلیج میکسیکو کا نام تبدیل کر کے اسے باضابطہ طور پر "خلیج امریکا" قرار دینے کے اعلامیہ پر دستخط کر دیے ہیں۔ اس فیصلے کے بعد، خلیج میکسیکو کو اب "خلیج امریکا" کے طور پر جانا جائے گا۔
صدر ٹرمپ نے اس موقع پر کینیڈا کو امریکا کی 51ویں ریاست بنانے کی اپنی خواہش کا بھی اعادہ کیا۔ یہ قدم ٹرمپ کی سابقہ بیانات کی تصدیق کرتا ہے، جنہوں نے عہدہ سنبھالنے کے بعد کہا تھا کہ وہ خلیج میکسیکو کا نام تبدیل کریں گے۔
اس کے علاوہ، ٹرمپ نے اپنے خطاب میں کہا کہ وہ دوسرے ممالک کو امریکا سے فائدہ اٹھانے کی اجازت نہیں دیں گے۔ ایران کے حوالے سے انہوں نے کہا کہ وہ جنگ کی بجائے جوہری معاہدے کو ترجیح دیں گے، اور اگر معاہدہ ہو گیا تو اسرائیل ایران پر بمباری نہیں کرے گا۔ تاہم، صدر ٹرمپ نے یہ بھی کہا کہ وہ ایران سے متعلق مزید تفصیلات فراہم نہیں کر سکتے اور امید ظاہر کی کہ ایران اپنی منصوبہ بندی پر عمل نہیں کرے گا۔