لاہور: وزیراعلی پنجاب مریم نواز نے تجاوزات کے خلاف مہم سے متاثرہ چھوٹے کاروباروں کی بحالی کے لیے بڑا فیصلہ کیا ہے۔
نمائندہ نیو نیوز وقاص غوری کے مطابق، وزیر اعلیٰ پنجاب نے چھوٹے کاروبار اور ریڑھی والوں کی بحالی کے لیے اقدامات کا جائزہ لینے کی ہدایت دی۔ مریم نواز نے کہا کہ ٹریفک کی روانی کے لیے تجاوزات کا خاتمہ ضروری ہے، لیکن یہ نہیں چاہتی کہ کسی غریب کا روزگار چھینا جائے۔ ان کا مزید کہنا تھا کہ بے روزگار ہونے والے افراد کے لیے متبادل انتظامات کرنا ضروری ہے۔
وزیر اعلیٰ پنجاب نے یہ بھی کہا کہ ہر شہر میں انسداد تجاوزات مہم سے متاثرہ افراد کے لیے متبادل جگہ فراہم کی جائے گی۔ انہوں نے انسداد تجاوزات مہم کے متاثرہ افراد کے روزگار کے لیے اقدامات کا جائزہ لیتے ہوئے کہا کہ بازاروں میں بے ہنگم تجاوزات کی وجہ سے عوام کا گزرنا مشکل ہو گیا تھا۔
انہوں نے قائد محمد نواز شریف کے حوالے سے کہا کہ قائد نے تجاوزات سے متاثرہ افراد کے لیے فوری اقدامات کی ہدایت کی تھی۔