لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) کے دسویں سیزن کے لیے انعامی رقم کا اعلان کر دیا ہے۔ بورڈ کے مطابق چیمپئن بننے والی ٹیم کو 5 لاکھ امریکی ڈالر (تقریباً ساڑھے 14 کروڑ روپے) دیے جائیں گے، جبکہ رنر اپ ٹیم کو 2 لاکھ ڈالر (تقریباً 5 کروڑ 61 لاکھ روپے) انعام ملے گا۔
ایچ بی ایل پی ایس ایل 10 کا آغاز آج راولپنڈی کرکٹ اسٹیڈیم میں رنگارنگ افتتاحی تقریب سے ہوگا، جس کے بعد پہلا میچ دفاعی چیمپئن اسلام آباد یونائیٹڈ اور لاہور قلندرز کے درمیان کھیلا جائے گا۔
اس سیزن میں مجموعی طور پر 34 میچز ہوں گے، جو 6 ٹیموں کے درمیان 18 مئی تک جاری رہیں گے۔ لاہور کے قذافی اسٹیڈیم میں 13 میچز ہوں گے جن میں دونوں ایلیمینیٹرز اور فائنل شامل ہے، راولپنڈی میں 11 میچز ہوں گے جن میں 13 مئی کو پہلا کوالیفائر بھی شامل ہے، جبکہ کراچی اور ملتان میں پانچ، پانچ میچز کھیلے جائیں گے۔
ٹورنامنٹ میں تین دن ایسے ہوں گے جب ڈبل ہیڈر (یعنی ایک دن میں دو میچز) کھیلے جائیں گے، جن میں دو ہفتہ کو اور ایک یوم مزدور (یکم مئی) کو رکھا گیا ہے۔
اس سیزن میں بھی گزشتہ سال کی کپتانی برقرار رکھی گئی ہے ، بابر اعظم پشاور زلمی، شاداب خان اسلام آباد یونائیٹڈ، محمد رضوان ملتان سلطانز اور شاہین شاہ آفریدی لاہور قلندرز کی قیادت کریں گے۔ کراچی کنگز اور کوئٹہ گلیڈی ایٹرز اس بار نئے کپتانوں، ڈیوڈ وارنر اور سعود شکیل کے ساتھ میدان میں اتریں گے۔
یاد رہے کہ 2024 کے سیزن میں اسلام آباد یونائیٹڈ نے تیسری بار ٹائٹل اپنے نام کیا تھا، جبکہ ملتان سلطانز مسلسل تیسری بار رنر اپ رہی تھی۔