کراچی: صدرِ مملکت آصف علی زرداری روبصحت ہوگئے ہیں، جس کے بعد انہیں کراچی کے نجی اسپتال سے چھٹی دے دی گئی ہے۔
صدر مملکت کئی روز سے طبیعت ناسازی کے باعث کراچی کے ایک نجی اسپتال میں زیر علاج تھے۔ ان کے معالج ڈاکٹر عاصم حسین کے مطابق صدر زرداری کا کورونا ٹیسٹ منفی آیا ہے اور ان کی طبیعت میں واضح بہتری دیکھی گئی ہے، جس کے بعد انہیں اسپتال سے ڈسچارج کر دیا گیا۔
ڈاکٹرز نے صدر مملکت کو مکمل آرام اور مزید فزیو تھراپی جاری رکھنے کی ہدایت دی ہے۔ یاد رہے کہ آصف علی زرداری کو یکم اپریل کو طبیعت خراب ہونے پر نوابشاہ سے کراچی منتقل کیا گیا تھا، جہاں وہ عیدالفطر کی رات سے اب تک زیر علاج تھے۔
صدر مملکت اسپتال میں 10 دن سے زائد زیر نگہداشت رہے اور اب ان کی حالت تسلی بخش بتائی جا رہی ہے۔