ٹیکساس : ٹیسلا اور سپیس ایکس کے بانی ایلون مسک نے چیٹ جی پی ٹی بنانے والی معروف کمپنی اوپن اے آئی کو خریدنے کے لیے 97.4 ارب ڈالر کی بولی لگائی ہے۔ امریکی اخبار کی رپورٹ کے مطابق، ایلون مسک کے وکیل نے یہ پیشکش اوپن اے آئی کے بورڈ آف ڈائریکٹرز کو جمع کرائی ہے۔
اوپن اے آئی کے سی ای او سام آلٹمین نے ایلون مسک کی پیشکش کو مسترد کرتے ہوئے طنزیہ انداز میں سابقہ ٹوئٹر (اب ایکس) پر لکھا کہ "پیشکش کا شکریہ! ہم اوپن اے آئی نہیں بیچ رہے لیکن اگر آپ چاہیں تو ہم ٹوئٹر کو 9.74 ارب ڈالر میں خریدنے کے لیے تیار ہیں۔"
ایلون مسک اور سام آلٹمین کے درمیان تنازعات شدت اختیار کر چکے ہیں، اور مسک نے اوپن اے آئی اور آلٹمین کے خلاف مقدمات بھی دائر کر رکھے ہیں۔ ایلون مسک نے 2015 میں اوپن اے آئی کی بنیاد رکھی تھی، لیکن 2018 میں انہوں نے کمپنی سے علیحدگی اختیار کر لی تھی، کیونکہ ان کا خیال تھا کہ اے آئی ٹیکنالوجی جوہری ہتھیاروں سے زیادہ خطرناک ثابت ہو سکتی ہے۔ 2023 میں ایلون مسک نے اپنی نئی اے آئی کمپنی "xAI" کی بنیاد رکھی ہے، جو مصنوعی ذہانت کی دنیا میں بڑا نام بنانے کی کوشش کر رہی ہے۔