کیلیفورنیا : واٹس ایپ کے صارفین کے لیے ایک خوشخبری ہے کہ ویب ورژن میں آڈیو اور ویڈیو کالنگ کی سہولت آخرکار متعارف کرادی گئی ہے، جس کا طویل عرصے سے مطالبہ کیا جا رہا تھا۔ اس وقت، آپ موبائل، ونڈوز، اور میک ڈیسک ٹاپ ایپس پر تو آڈیو اور ویڈیو کالز کر سکتے ہیں، لیکن ویب ورژن میں یہ فیچر دستیاب نہیں تھا۔
WABetaInfo کی رپورٹ کے مطابق، واٹس ایپ ویب ورژن میں آڈیو اور ویڈیو کالز کا فیچر اب محدود بیٹا (beta) صارفین کے لیے متعارف کرایا گیا ہے۔ اس فیچر کے ذریعے صارفین اینڈ ٹو اینڈ انکرپٹڈ کالز کے ساتھ اسکرین شیئرنگ بھی کر سکیں گے، جو کہ ویب ورژن کے لیے ایک اہم اپ ڈیٹ ہے۔
یہ فیچر اس وقت صرف ون آن ون چیٹس میں دستیاب ہے، اور ابھی یہ صرف محدود صارفین کو ہی دستیاب ہے، لیکن توقع کی جا رہی ہے کہ اسے جلد ہی بڑے پیمانے پر متعارف کرایا جائے گا۔ ویب ورژن میں بھی کالز کو اینڈ ٹو اینڈ انکرپشن کے ذریعے تحفظ حاصل ہوگا، اور کالز کے لیے سگنل پروٹوکول استعمال کیا جائے گا، جو واٹس ایپ 2016 سے استعمال کر رہا ہے۔