کراچی میں سابق صدر آصف علی زرداری کی طرف سے کی جانیوالی دھواں دار پریس کانفرنس میں زرداری صاحب کچھ زیادہ ہی بول گئے جہاں انہوں نے یہاں تک کہہ دیا کہ فیض حمید تو کھڈے لائن لگ چکے ہیں ۔
آصف زرداری کے اس بیان کے بعد اب وضاحت بھی پیش کر دی گئی ہے ،کراچی میں پریس کانفرنس کے دوران کور کمانڈر پشاور سے متعلق ایک سوال کے جواب میں سابق صدر آصف زرداری نےبرجستہ کہا فیض حمید کی بات نہ کریں وہ کھڈے لائن ہیں، تاہم وزیر اطلاعات شرجیل میمن کی جانب سے وضاحت کی گئی ہے کہ پریس کانفرنس کے آخر میں کہا گیا جملہ دانستہ نہیں تھا ۔
واضح رہے بیان کے چند گھنٹوں بعد ہی سابق صدر آصف علی زرداری نے وضاحت جاری کرتے ہوئے کہا کہ پریس کانفرنس کے آخر میں جملہ دانستہ نہیں تھا۔
یہاں یہ بات قابل ذکر ہے کہ مذکورہ سوال سے قبل سابق صدر کا کہنا تھا کہ پہلی بار فوج غیرسیاسی ہوئی تو مجھے جنرل قمر جاوید باجوہ کو سیلوٹ نہیں کرنا چاہیے، ہمیں پتہ چل گیا کہ وہ غیر سیاسی رہ سکتے ہیں ،خواہش ہے کہ وہ ایسے ہی رہے۔