کیلیفورنیا : گوگل میپس نے اپنے نئے ورژن میں ایک ایسا فیچر متعارف کرانے کی تیاری شروع کر دی ہے جو پیدل چلنے والوں کو سورج کی روشنی سے بچنے میں مدد فراہم کرے گا۔ یہ نیا فیچر "پریفر شیڈ" کے نام سے جانا جائے گا، جو مخصوص راستوں پر سایہ دار علاقے منتخب کرنے میں مدد دے گا تاکہ لوگ سورج کی تیز شعاعوں سے محفوظ رہ سکیں۔
اینڈرائیڈ اتھارٹی کی ایک رپورٹ کے مطابق، اس فیچر کی آزمائش شروع ہو چکی ہے اور یہ خاص طور پر گرم موسم میں مددگار ثابت ہوگا، جب الٹرا وائلٹ شعاعوں کی سطح زیادہ ہوتی ہے۔ اس فیچر کے ذریعے پیدل چلنے والے افراد ان راستوں کا انتخاب کر سکیں گے جہاں سائے میں چلنا ممکن ہوگا، جو کہ نہ صرف موسم گرما میں، بلکہ سردیوں میں بھی فائدہ مند ثابت ہوگا۔
یہ فیچر "پریفر شیڈ" کے نام سے گوگل میپس کے ٹرپ آپشنز میں شامل ہوگا، اور صارفین کو اس بات کی اطلاع دے گا کہ کون سے راستے سائے والے ہیں اور کہاں سورج کی روشنی زیادہ ہوگی۔ اگرچہ یہ فیچر ابھی آزمائشی مراحل میں ہے، گوگل نے اس کے جلد متعارف ہونے کی توقع ظاہر کی ہے، تاہم ابھی تک یہ واضح نہیں کہ گوگل میپس سائے والے راستوں کو کس طرح نشان زد کرے گا۔
ماہرین کا کہنا ہے کہ یہ فیچر خاص طور پر ان افراد کے لیے مفید ثابت ہوگا جو شہر میں پیدل چلتے ہیں، اور جو طویل عرصے تک باہر رہ کر سورج کی روشنی سے بچنا چاہتے ہیں۔
گوگل میپس کی جانب سے اس نئے فیچر کا مقصد نہ صرف صارفین کی سہولت ہے بلکہ موسم کی شدت کے اثرات کو کم کرنے میں بھی مددگار ثابت ہوگا۔ یہ فیچر گوگل میپس کے دیگر نیویگیشن آپشنز کے ساتھ انٹرفیس میں ضم ہو کر، زیادہ بہتر اور محفوظ تجربہ فراہم کرے گا۔