لاس اینجلس : ہالی ووڈ کی مشہور اداکارہ انجلینا جولی نے اپنے تاریخی اور محل نما گھر کو فروخت کرنے کی تیاری شروع کر دی ہے۔ یہ شاندار جائیداد لاس فیلیز کے علاقے میں واقع ہے اور 2 ایکڑ سے زائد رقبے پر محیط ہے، جہاں کبھی مشہور فلمساز سیسل بی ڈی مِل تقریباً 40 سال تک رہائش پذیر رہے تھے۔
انجلینا جولی نے یہ گھر 2017 میں 2 کروڑ 45 لاکھ ڈالر میں خریدا تھا۔ 1913 میں تعمیر ہونے والے اس مکان میں 6 بیڈ رومز، 10 باتھ رومز، 4 فائر پلیسز، ایک وسیع وائن سیلر، چائے خانہ، اور گرِفتھ آبزرویٹری کے خوبصورت نظارے شامل ہیں۔ اس کے علاوہ، مکان میں رسمی باغات اور جھرنوں والا سوئمنگ پول بھی موجود ہے۔
کورونا وائرس کی وبا کے دوران، انجلینا جولی نے اپنے بچوں کے ساتھ اسی گھر میں قیام کیا اور لاس اینجلس میں لگنے والی جنگلاتی آگ سے متاثر ہونے والے اپنے دوستوں کو بھی یہاں پناہ دی تھی۔
یہ جائیداد اصل طرزِ تعمیر کے مطابق مکمل بحال کی گئی ہے، جس میں نفیس مولڈنگ، کلاسیکی لکڑی کا کام، کشادہ ڈرائنگ رومز اور فرانسیسی دروازے شامل ہیں۔ اب اداکارہ اس تاریخی اور خوبصورت گھر کو نئے مالک کے حوالے کرنے کی تیاریاں کر رہی ہیں۔