حکومتی اصلاحات رنگ لے آئیں: مالی خسارے میں کمی، پاکستان کا 'پانڈا بانڈز' متعارف کرانے کا فیصلہ

اسلام آباد : وفاقی وزیر خزانہ محمد اورنگزیب نے معاشی محاذ پر بڑی کامیابیوں کی نوید سناتے ہوئے کہا ہے کہ ملک کا مالی خسارہ کم ہو گیا ہے اور حکومت بین الاقوامی مالیاتی مارکیٹ میں ’پانڈا بانڈز‘ جاری کرنے کے لیے مکمل طور پر تیار ہے۔ ان خیالات کا اظہار انہوں نے امریکی نائب معاون وزیر خارجہ جان مارک سے ایک اہم ملاقات کے دوران کیا۔
وزیر خزانہ نے امریکی وفد کو پاکستان کی معاشی بحالی کے روڈ میپ سے آگاہ کرتے ہوئے درج ذیل اہم اشاریے پیش کیے۔حکومتی پالیسیوں کے باعث مالی خسارہ محدود ہوا ہے جبکہ کرنٹ اکاؤنٹ کی پوزیشن مستحکم ہوئی ہے۔وزیر خزانہ نے بتایا کہ آئی ٹی کے شعبے میں برآمدات میں تیزی سے اضافہ ہو رہا ہے جو ملکی زرمبادلہ کے لیے خوش آئند ہے۔
 پاکستان اب عالمی سرمایہ کاری کی منڈیوں میں دوبارہ قدم جمانے کے لیے تیار ہے، جس کے لیے ’پانڈا بانڈز‘ کا اجرا پہلا بڑا قدم ہوگا۔ غیر ملکی سرمایہ کاروں کو پاکستان لانے کے لیے خصوصی سہولیات اور اصلاحات کا عمل تیز کر دیا گیا ہے۔
محمد اورنگزیب نے مالیاتی نظم و ضبط برقرار رکھنے کے عزم کا اعادہ کرتے ہوئے کہا کہ حکومت مشکل فیصلے کر کے معیشت کو پائیدار بنیادوں پر استوار کر رہی ہے۔ امریکی نائب معاون وزیر خارجہ جان مارک نے پاکستان میں جاری معاشی استحکام کی کوششوں کو سراہا اور دوطرفہ تعاون بڑھانے کی خواہش کا اظہار کیا۔
    پانڈا بانڈ (Panda Bond)، یہ ایک ایسا مالیاتی بانڈ ہے جو غیر ملکی ادارے یا حکومتیں چین کی مقامی مارکیٹ میں چینی کرنسی (یوآن) میں جاری کرتی ہیں۔ پاکستان اس کے ذریعے چینی سرمایہ کاروں سے فنڈز حاصل کرے گا۔