لاہور :جعفر ایکسپریس پر دہشت گردوں کے حملے کے بعد وفاقی وزیر داخلہ محسن نقوی نے وزیراعلیٰ بلوچستان سرفراز بگٹی سے مسلسل رابطہ برقرار رکھا۔ وزیر داخلہ نے افسوسناک واقعے پر اظہار افسوس کیا اور بلوچستان حکومت کو مکمل تعاون کی یقین دہانی کرائی۔
دونوں رہنماؤں نے سکیورٹی فورسز کی مؤثر کارروائی کو سراہا اور دہشت گردی کے خاتمے کے لیے تمام ضروری وسائل بروئے کار لانے کے عزم کا اعادہ کیا۔ محسن نقوی نے کہا کہ بلوچستان میں قیام امن کے لیے صوبائی حکومت کو ہر ممکن تعاون فراہم کیا جائے گا اور ہم مل کر دہشت گردوں کا صفایا کریں گے۔ انہوں نے کہا کہ دہشت گردوں اور ان کے سہولت کاروں کا خاتمہ کرنے کے لیے ہم آٹھنے تک جائیں گے۔
وزیراعلیٰ بلوچستان سرفراز بگٹی نے کہا کہ حملہ آوروں کو زمین پر جگہ نہیں ملے گی، ادارے ان کا پیچھا کر رہے ہیں اور کوئی بھی دہشت گرد بچنے نہیں پائے گا۔ وفاقی وزیر داخلہ نے جعفر ایکسپریس سے مسافروں کو بحفاظت بازیاب کرانے پر سکیورٹی فورسز کو خراج تحسین پیش کیا اور کہا کہ پاکستان کی بہادر سکیورٹی فورسز نے بروقت کارروائی کر کے 16 سے زائد دہشت گردوں کو ہلاک کیا اور ان کے ناپاک عزائم کو ناکام بنایا۔
انہوں نے مزید کہا کہ زخمی مسافروں کی جلد صحتیابی کے لیے دعا گو ہیں اور نہتے مسافروں پر حملہ ایک غیر انسانی فعل ہے۔ محسن نقوی نے اس بات پر زور دیا کہ معصوم مسافروں پر حملہ کرنے والے ملک و قوم کے دشمن ہیں۔ وزیر داخلہ نے کہا کہ دشمن قوتیں بلوچستان میں دہشت گردی کے ذریعے ملک میں عدم استحکام پیدا کرنے کی گھناؤنی سازش کر رہی ہیں، لیکن قوم کی حمایت سے ایسی ہر سازش کو ناکام بنایا جائے گا۔