لاہور : پاکستان کے مختلف علاقوں میں آج سے گرمی میں اضافے کی پیشگوئی کی گئی ہے۔ محکمہ موسمیات کی جانب سے ہیٹ ویو الرٹ جاری کیا گیا ہے جس میں کہا گیا ہے کہ 18 اپریل تک دن کا درجہ حرارت معمول سے 6 سے 8 ڈگری سینٹی گریڈ زیادہ رہنے کا امکان ہے۔
محکمہ موسمیات کے مطابق اسلام آباد، وسطی اور بالائی پنجاب، کشمیر ، خیبر پختونخوا اور گلگت بلتستان میں پیر سے جمعہ تک درجہ حرارت میں 4 سے 6 ڈگری تک اضافہ ہو سکتا ہے۔ اس دوران آندھی یا جھکڑ چلنے کی بھی توقع ہے۔
محکمہ موسمیات کے مطابق، گزشتہ روز ملک کے مختلف شہروں میں درجہ حرارت میں اضافہ دیکھا گیا، نواب شاہ، حیدرآباد اور دادو میں سب سے زیادہ 43 ڈگری سینٹی گریڈ ریکارڈ کیا گیا، جبکہ کراچی میں 39، ڈی آئی خان میں 37، لاہور اور پشاور میں 35، اور اسلام آباد میں 33 ڈگری سینٹی گریڈ تک پہنچا۔