اسلام آباد: مسلم لیگ ن کی ترجمان مریم اورنگزیب کا کہنا ہے کہ آج بیک وقت عوام کا معاشی اور پارلیمان کا آئینی قتل ہوگا ۔ پارلیمانی عمل بلڈوز کرکے دو آرڈیننس، اور 25 بل منظور کرانے پر آج کے دن کو یوم سیاہ کے طورپر یاد رکھا جائے گا۔
پاکستان مسلم لیگ (ن) کی ترجمان مریم اورنگزیب نے اپنے بیان میں کہا کہ عمران صاحب آج کی قانون سازی سے اپنی لوٹ مار، اے ٹی ایمز، مافیاز اور کارٹلز کو این آر او دیں گے ۔
عمران صاحب ایگزیکٹو آرڈر کے ذریعے ججوں کی تقرری کا اختیار اپنے پاس لے کر قانون اور آئین کی تضحیک کر رہے ہیں ۔ عمران صاحب آج طاقت ور چوروں کو لوٹ مار پہ این آر او اور عوام کو مزید لوٹنے کا لائسنس دیں گے ۔ عمران صاحب آج جمہوریت ، آئین اور قانون کے قتل کی تاریخ رقم کریں گے ۔
انہوں نے کہا کہ فسطائیت کا بلڈزور چلا کر عمران صاحب قوم پر منی بجٹ مسلط کریں گے ۔ ساڑھے تین سال میں ایک قانون سازی بھی عمران صاحب اتفاق رائے سے نہ کراسکے ۔ آج پاکستان کا برانڈ بھیک، آئی ایم ایف کی غلامی، مہنگائی اور معاشی تباہی ہے ۔
مریم اورنگزیب کا کہنا تھا کہ پارلیمان کے جنگلے گرانے والے آج پارلیمان کے جمہوری عمل ، قاعدے قانون کو روند رہے ہیں ۔ پاکستان میں آج تاریخ کا مہنگا ترین بجٹ مسلط کیاجائے گا ۔ عمران صاحب کے وعدہ کے مطابق آج پارلیمان کے ذریعے قوم کو رلانے کا بندوبست کیا جا رہا ہے،آج کے بعد عوام اب صرف ایک خودکشی کی منتظر ہے۔
