کوئٹہ: 11 مارچ کو جعفر ایکسپریس پر دہشت گردوں کے حملے میں زخمی ہونے والے 29 افراد کو کوئٹہ منتقل کر دیا گیا۔ ہسپتال انتظامیہ کے مطابق 16 زخمیوں کو سی ایم ایچ اور 13 زخمیوں کو سول ہسپتال لایا گیا۔ تمام زخمیوں کی حالت خطرے سے باہر ہے۔
ریلوے پولیس نے تصدیق کی ہے کہ حملے میں شہید ہونے والوں میں ریلوے پولیس کے اہلکار شمروز بھی شامل ہیں۔ زخمیوں نے یہ بھی بتایا کہ پاک فون نے ان کی بھرپور مدد کی۔ دہشت گردوں کے حملے کے بعد کوئٹہ سے پشاور جانے والی جعفر ایکسپریس کے ڈرائیور امجد یاسین معجزانہ طور پر محفوظ رہے۔
پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف نے بتایا کہ جعفر ایکسپریس کے یرغمالی مسافر بازیاب ہو گئے ہیں اور تمام 33 دہشت گرد ہلاک کر دیے گئے ہیں۔ انہوں نے کہا کہ 11 مارچ کو بولان میں دہشت گردوں نے ریلوے ٹریک کو نشانہ بنایا اور جعفر ایکسپریس کو روک لیا۔ ریلوے حکام نے بتایا کہ ٹرین میں 440 افراد موجود تھے۔
لیفٹیننٹ جنرل احمد شریف کے مطابق کلیئرنس آپریشن کے دوران کسی بھی مسافر کو نقصان نہیں پہنچا، تاہم آپریشن سے پہلے دہشت گردوں کی بربریت میں 21 مسافر شہید ہو گئے، جبکہ ایف سی کے 4 جوان بھی شہید ہوئے۔ ان میں سے تین ایف سی کے جوانوں کو قریبی پکٹ پر دہشت گردوں نے شہید کیا تھا، اور ایک جوان آپریشن کے دوران شہید ہوا۔واضح رہے کہ دہشت گردوں نے جعفر ایکسپریس پر حملہ کر کے مسافروں کو یرغمال بنا لیا تھا، جس کے بعد سکیورٹی فورسز نے کامیاب کلیئرنس آپریشن کیا۔