واشنگٹن: امریکی صدر ڈونلڈ ٹرمپ نے حکومتی فنڈنگ کے متعلق ایک اہم بل پر دستخط کر کے ملک میں جاری حکومتی شٹ ڈاؤن کا خاتمہ کر دیا۔ اس اقدام کے بعد 43 دنوں سے جاری شٹ ڈاؤن کا بحران اختتام پذیر ہوا، جس سے ہزاروں سرکاری ملازمین اور اہم حکومتی خدمات کو متاثر کیا گیا تھا۔
امریکی ایوانِ نمائندگان میں شٹ ڈاؤن کو ختم کرنے کے لیے بل کی منظوری کے دوران 222 ارکان نے اس بل کے حق میں ووٹ دیا، جبکہ 209 نے مخالفت کی۔ دلچسپ بات یہ ہے کہ چھ ڈیموکریٹ ارکان نے بھی ریپبلیکنز کا ساتھ دیا اور اس بل کی حمایت کی۔
صدر ٹرمپ نے اس بل پر دستخط کرنے کے بعد کہا، "آج کا دن امریکہ کی تاریخ کا ایک بہترین دن ہے، ملک کبھی اس سے بہتر حالت میں نہیں رہا۔" ان کے اس بیان کے بعد حکومتی نظام دوبارہ معمول کی طرف واپس آ گیا ہے، اور مالی سرگرمیاں بغیر رکاوٹ جاری رہ سکیں گی۔
شٹ ڈاؤن کے دوران، ہزاروں سرکاری ملازمین بغیر تنخواہ کے کام کر رہے تھے، جب کہ کئی کو رخصت پر بھیج دیا گیا اور کچھ کو ملازمتوں سے نکال دیا گیا تھا۔ اخراجاتی بل کی منظوری کے ساتھ، حکومت کے لیے 30 جنوری تک فنڈز فراہم کرنے کی ضمانت حاصل ہو گئی ہے۔
اس بل کا مقصد صرف حکومتی ملازمین کو تنخواہیں فراہم کرنا ہی نہیں، بلکہ اہم حکومتی خدمات جیسے غذائی امدادی سکیموں کی بحالی اور ایئر ٹریفک کنٹرول نظام کو دوبارہ فعال کرنا بھی تھا، جو شٹ ڈاؤن کے دوران متاثر ہوئے تھے۔