اسلام آباد : وفاقی حکومت نے 14 اگست 2026 سے پیٹرولیم مصنوعات کی نئی قیمتوں کا اعلان کردیا ہے، جس کے تحت ہائی اسپیڈ ڈیزل مہنگا کردیا گیا ہے۔
وزارتِ توانائی کے پیٹرولیم ڈویژن کے مطابق نظرثانی شدہ پیٹرولیم قیمتوں کے طریقہ کار کے تحت آئل اینڈ گیس ریگولیٹری اتھارٹی (اوگرا) نے پیٹرولیم مصنوعات کی ایکس ڈپو قیمتوں کا ازسرِنو جائزہ لیا۔
جاری کردہ نوٹیفکیشن کے مطابق ہائی اسپیڈ ڈیزل کی قیمت میں ایک روپے 16 پیسے فی لیٹر اضافہ کیا گیا ہے۔ قیمت میں اضافے کے بعد ڈیزل کی نئی قیمت 383 روپے 95 پیسے فی لیٹر مقرر کردی گئی ہے، جبکہ اس سے قبل ہائی اسپیڈ ڈیزل 382 روپے 79 پیسے فی لیٹر میں دستیاب تھا۔
نئی قیمتوں کا اطلاق 14 اگست 2026 سے ہوگا۔ ڈیزل کی قیمت میں اضافے کے بعد ٹرانسپورٹ، مال برداری اور دیگر شعبوں کے اخراجات پر بھی اثر پڑنے کا امکان ہے، کیونکہ ہائی اسپیڈ ڈیزل ملکی نقل و حمل اور صنعتی سرگرمیوں میں بڑے پیمانے پر استعمال ہوتا ہے۔
حکام کے مطابق نئی قیمتوں کا تعین مقررہ طریقہ کار کے تحت عالمی مارکیٹ میں تیل کی صورتحال اور دیگر متعلقہ عوامل کو مدنظر رکھتے ہوئے کیا گیا ہے۔