کراچی: چیئرمین پیپلزپارٹی بلاول بھٹو زرداری نے جعفر ایکسپریس پر دہشت گردوں کے حملے کی شدید مذمت کی ہے اور کہا ہے کہ پوری قوم اپنی بہادر افواج کے ساتھ کھڑی ہے۔ انہوں نے اس بات پر زور دیا کہ دہشت گردی کے خلاف جنگ میں ہمیں سب کو متحد ہونا ہوگا۔
کراچی میں سندھ جاب پورٹل کی افتتاحی تقریب سے خطاب کرتے ہوئے بلاول بھٹو زرداری نے کہا کہ سندھ کے نوجوانوں کی ترقی ان کا وژن ہے اور وہ سندھ کے عوام کی خدمت کرنا چاہتے ہیں۔ انہوں نے کہا کہ پورے سندھ کی معیشت پرائیوٹ سیکٹر چلاتا ہے، اور روزگار کے مواقع عوام کو فراہم کرنا حکومت کا کام ہے۔
بلاول بھٹو نے آئی ٹی کے استعمال سے "آئی ورک فار سندھ پورٹل" کے آغاز کا اعلان کرتے ہوئے سندھ کے نوجوانوں اور جاب کریئیٹرز کو اس پلیٹ فارم پر شامل ہونے کی دعوت دی، تاکہ جدید ٹیکنالوجی کی مدد سے پرائیویٹ سیکٹر کے ساتھ مل کر نوجوانوں کو روزگار فراہم کیا جا سکے۔
جعفر ایکسپریس پر ہونے والے دہشت گرد حملے کی مذمت کرتے ہوئے بلاول بھٹو نے کہا کہ سکیورٹی فورسز نے بہت تیزی اور بہادری سے دہشت گردوں کا مقابلہ کیا، اور کامیابی سے آپریشن مکمل کیا۔ انہوں نے سکیورٹی فورسز کو خراج تحسین پیش کیا اور کہا کہ پوری قوم دہشت گردی کے خلاف جنگ میں کامیاب ہوگی۔
انہوں نے مزید کہا کہ وزیر اعلیٰ مراد علی شاہ نے ایک سال کی رپورٹ پیش کی، جس میں عوام کو سندھ حکومت کے اقدامات اور وژن سے آگاہ کیا گیا۔ بلاول بھٹو نے سندھ اسمبلی میں پانی کی تقسیم پر ارکان کا موقف لیا اور کہا کہ آپ کے تحفظات وفاق تک پہنچا رہے ہیں۔
چیئرمین پیپلزپارٹی نے کہا کہ پاکستان کی کامیابی ہم سب کی کامیابی ہے، اور حکومتی اقدامات کی بدولت مہنگائی میں اضافہ نہیں ہو رہا، جس کا وہ خیرمقدم کرتے ہیں۔ انہوں نے عوام تک ریلیف پہنچانے میں حکومت کے ساتھ تعاون کا عزم بھی ظاہر کیا۔