وزیراعلیٰ پنجاب مریم نواز کا آئندہ ہفتے دورۂ آذربائیجان کا فیصلہ، باکو میں 'ورلڈ اربن فورم' سے خطاب کریں گی

لاہور:وزیراعلیٰ پنجاب مریم نواز شریف آئندہ ہفتے آذربائیجان کے دارالحکومت باکو کا اہم دورہ کریں گی۔ اپنے اس دورے کے دوران وہ وہاں منعقد ہونے والے 13ویں ورلڈ اربن فورم (World Urban Forum) میں پاکستان اور پنجاب کی نمائندگی کریں گی۔
ذرائع کے مطابق، مریم نواز اس عالمی کانفرنس میں دنیا بھر کے شہروں کو درپیش رہائشی مسائل اور پائیدار شہری ترقی کے موضوع پر اظہارِ خیال کریں گی۔ وہ پنجاب میں جاری حالیہ ترقیاتی منصوبوں اور ماڈل ہاؤسنگ اسکیموں کے حوالے سے بھی شرکاء کو آگاہ کریں گی۔
 وزیراعلیٰ دنیا بھر کے رہنماؤں کے سامنے سستی اور معیاری رہائش کی فراہمی سے متعلق تجاویز پیش کریں گی۔
 مریم نواز باکو میں دیگر ممالک کے وفود اور شہری منصوبہ بندی کے ماہرین سے بھی ملاقاتیں کریں گی۔ دورے کا مقصد پنجاب کے شہروں کو عالمی معیار کے مطابق پائیدار بنیادوں پر استوار کرنے کے لیے بین الاقوامی تعاون حاصل کرنا ہے۔
یہ عالمی فورم اقوامِ متحدہ کے زیرِ اہتمام منعقد کیا جا رہا ہے، جس میں مریم نواز کی شرکت کو پنجاب کے لیے بین الاقوامی سرمایہ کاری اور جدید شہری اصلاحات کے حوالے سے انتہائی اہم قرار دیا جا رہا ہے۔