مستونگ : بلوچستان کے ضلع مستونگ میں دشت روڈ پر بلوچستان کانسٹیبلری کی گاڑی کے قریب ریموٹ کنٹرول دھماکا ہوا، جس کے نتیجے میں 3 پولیس اہلکار شہید اور متعدد زخمی ہو گئے۔
پولیس حکام کے مطابق یہ دھماکا دشت روڈ پر کھنڈ مہسوری کے علاقے میں ہوا۔ دھماکا موٹرسائیکل پر نصب بارودی مواد سے کیا گیا تھا۔ حکام نے بتایا کہ بلوچستان کانسٹیبلری کے اہلکار ڈیوٹی سے واپس آ رہے تھے جب یہ حملہ کیا گیا۔
واقعے کے فوراً بعد سیکیورٹی فورسز کے اہلکار جائے وقوعہ پر پہنچ گئے اور زخمی اہلکاروں کو ہسپتال منتقل کر دیا۔ جاں بحق ہونے والے اہلکاروں کی لاشیں بھی ہسپتال پہنچا دی گئی ہیں۔
بلوچستان حکومت کے ترجمان شاہد رند کا کہنا ہے کہ دھماکے میں بلوچستان کانسٹیبلری کے 3 جوان شہید ہوئے ، جبکہ 16 اہلکار زخمی ہوئے ہیں ، تاہم زخمیوں میں 2 اہلکاروں کی حالت تشویشناک ہے۔شہید زخمیوں کو کوئٹہ منتقل کیا جا رہا ہے اور واقعے کی ابتدائی رپورٹ طلب کرلی گئی ہے۔