اسلام آباد : وزیراعظم شہباز شریف ایک اعلیٰ سطحی وفد کے ہمراہ سعودی عرب، قطر اور ترکیہ کے اہم دورے پر روانہ ہو گئے ہیں۔ یہ دورہ ایک ایسے وقت میں ہو رہا ہے جب خطے میں ایران اور امریکہ کے درمیان کشیدگی اور سفارتی سرگرمیوں میں تیزی آئی ہے، جس کے باعث پاکستان کا علاقائی امن کے لیے کردار مزید اہمیت اختیار کر گیا ہے۔
ترجمان دفترِ خارجہ کے مطابق، وزیراعظم سعودی ولی عہد شہزادہ محمد بن سلمان کی خصوصی دعوت پر سعودی عرب کا دورہ کر رہے ہیں۔ ان کے ہمراہ نائب وزیراعظم و وزیر خارجہ اسحاق ڈار، وزیر اطلاعات عطااللہ تارڑ اور معاون خصوصی طارق فاطمی بھی موجود ہیں۔ سعودی قیادت سے ملاقاتوں میں دوطرفہ تعلقات کی مضبوطی، معاشی تعاون اور مشرقِ وسطیٰ کی مجموعی صورتحال پر تبادلہ خیال کیا جائے گا۔
سعودی عرب کے بعد وزیراعظم قطر پہنچیں گے جہاں وہ قطری قیادت سے علاقائی امن و سلامتی اور سرمایہ کاری کے امور پر بات چیت کریں گے۔ دورے کے آخری مرحلے میں وزیراعظم شہباز شریف ترکیہ جائیں گے، جہاں وہ پانچویں انطالیہ ڈپلومیسی فورم میں شرکت کریں گے۔ اس فورم کے دوران وہ عالمی رہنماؤں سے ملاقاتیں کریں گے اور عالمی سفارت کاری میں پاکستان کا نقطہ نظر پیش کریں گے۔
ذرائع کے مطابق، وزیراعظم کے اس سہ ملکی دورے کے دو بڑے مقاصد ہیں۔ایران اور امریکہ کے درمیان جاری کشیدگی کو کم کرنے کے لیے دوست ممالک کو اعتماد میں لینا۔ قطر اور سعودی عرب سے پاکستان میں بڑی سرمایہ کاری کے منصوبوں کو حتمی شکل دینا۔
وزیراعظم ان اہم ممالک کی قیادت سے ملاقاتیں مکمل کرنے کے بعد 18 اپریل کو وطن واپس پہنچیں گے۔ سیاسی مبصرین اس دورے کو پاکستان کی "فعال سفارت کاری" کا اہم حصہ قرار دے رہے ہیں، جس کا مقصد خطے میں جنگ کے بادلوں کو چھٹنا اور ملکی معیشت کے لیے نئے راستے تلاش کرنا ہے۔